Petropavlda bıyl 79 adam maskúnemdikten májbúrli túrde emdeldi
Soltústik Qazaqstan oblysy polıtsııa departamenti baspasóz qyzmetiniń málimetinshe, negizinen mas kúıde jasalatyn úı ishindegi urys-janjal, buzaqylyq, densaýlyqqa zııan keltirý sııaqty qylmystardyń aldyn alý maqsatynda ýchaskelik polıtsııa ınspektorlary júıeli túrde qyzmet kórsetetin aýmaqtaryndaǵy quqyq buzýshylyqtar jasaýǵa beıim tulǵalardy tekserý jumystaryn júrgizedi.
Bul jumystar qarashanyń sońynda bastalǵan «Zorlyq-zombylyqsyz 16 kún» respýblıkalyq aktsııasy aıasynda kúsheıtildi. Іs-sharanyń basynan 30 adamǵa qatysty otbasy-turmystyq qatynastar salasynda quqyq buzýshylyqqa jol bergen qorǵaý uıǵarymdary shyǵaryldy.
Birer kún buryn Petropavl qalasy polıtsııa basqarmasynyń ýchaskelik polıtsııa ınspektorlary Jambyl aýdanynyń Blagoveşenka aýylynda ornalasqan májbúrlep emdeýdiń narkologııalyq uıymyna maskúnemdikten emdelýge 10 adamdy jiberdi.
«Polıtsııa qyzmetkerlerine maskúnemderdi májbúrlep emdelýge jiberý úshin jaqyndarynyń ótinishteri qajet. Tek sodan keıin ǵana qajetti qujattar jınalady. Emdeý birneshe aıǵa sozylady. Bul maskúnemdikke salynǵan adamdar úshin durys ómir súrýge oralýdyń birden bir joly», - deıdi Petropavl qalalyq PB Jergilikti polıtsııa qyzmeti bóliminiń bastyǵy Rýstam Sadýlov.
Jalpy, jyl basynan petropavldyq polıtseıler 79 adamdy maskúnemdikten májbúrlep emdelýge jiberdi. Al 11 aıda oblys ortalyǵynda mas kúıde jasalǵan 318 qylmys tirkeldi.