Petropavlda bıyl 700 úıdi súrý kózdelip otyr
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov halyqpen esepti kezdesýinde turǵyn úı qurylysyna qatysty josparlarmen bólisti, dep habarlaıdy QazAqparat tilshisi.
Óńir basshysynyń aıtýynsha, sońǵy 5 jyldaǵy tsıfrlardy salystyrýdan baspana qurylysynyń aıtarlyqtaı óskenin kórýge bolady. Máselen 2015 jyly jalpy aýdany 140 myń sharshy metr bolatyn 1 myń páter paıdalanýǵa berilse, byltyr bul kórsetkish 3 ese artty, kóp qabatty 24 úı turǵyzyldy. 12 myń soltústikqazaqstandyq 3300 jańa páterde qonys toıyn toılady.
Tek Petropavlda qurylys 48 alańda júrgizildi, bıyl olardyń sany 56-ǵa jetpek.
«Turǵyn úı qory eski úılerdi buzý arqyly jańaryp jatyr. Sońǵy úsh jylda myńnan astam úı súrildi, olardyń ıeleri páter jaǵdaılaryn jaqsartty. Bıyl 700 jeke úıdi buzýdy josparladyq. Olardyń ornynda kópqabatty 23 baspana turǵyzylady, bul – 3,5 myń páter. 30 jeke úıdiń ornyna 300 páterli baspana turǵyzýǵa bolady», - dedi Qumar Aqsaqalov.
Oblys ákiminiń aıtýynsha, endi jeke úıleri buzylǵandarǵa tek salynyp jatqan jańa úılerden ǵana páter beriletin bolady.
Jańa úıler «Jas Órken», «Bereke» yqshamaýdandarynda, Ýálıhanov kóshesiniń boıynda turǵyzylyp jatyr. Alda «Kopaı men «Naberejnyı» shaǵynaýdandarynda qurylys bastalmaq.
