Petropavlda bıyl 5 mlrd teńgege joldar jóndelmek
Petropavldaǵy negizgi máselelerdiń biri – jol. Qar ketisimen asfalttiń oı-shuńqyry shyǵyp, keı kóshelerde kólikpen júrý qıyndyq týdyrǵan. Petropavl ákimi Rýslan Ańbaev bul problemaǵa qanyq. Eseptik kezdesýge jınalǵan halyqqa bul problemanyń bıyl sheshiletindigin jetkizdi.
«Ótken aptada oblys ákimi Aıdarbek Saparovpen birge qalany aralap, joldardyń jaǵdaıyn tekserdik. Ashyq aıtý qajet, joldardyń jaǵdaıy – nashar. Muny oblys ákimi de kórdi. Qańtar aıynda oblystyq bıýdjetten Petropavl joldaryn jóndeýge 4 mlrd teńge bólingen edi. Oblys ákimi 4 mlrd-qa qosymsha taǵy 1 mlrd teńge bólýdi qarastyryp otyr.
Jóndeý jumystaryn 18 kóshede júrgizemiz. Birinshi kezekte: N.Nazarbaev, Jabaev, Internatsıonal, Abaı kóshelerin qamtımyz. Bıyl jer úı sektoryndaǵy joldarǵa da nazar aýdaramyz. Jumysshy kentindegi Ýkraınskaıa, Panfılov, Pobelıanskıı jáne Zoıa Kosmodemıanskaıa kóshelerin jóndeımiz.
5 mlrd teńge – úlken qarajat, qalamyzǵa úlken kómek», - dedi qala ákimi.
Rýslan Ańbaevtyń aıtýynsha, atalǵan kósheler tolyq jóndelmeı, tek problemaly ýchaskeleri ǵana jónge keltirilmek. Budan basqa shuńqyrlar tegisteledi.
«Bıyl úsh avtomobıl jolynda jóndeý jumysy jalǵasady, olar: Jumabaev kóshesi, Pıoner kóshesinen Chkalovqa deıin; Sútishevten Petrov kóshesine deıingi aralyqtaǵy Gorkıı kóshesi jáne Ibraevtan Malaıa kóshesine deıingi Gromovoı kóshesiniń qurylysy. Bıýdjettik tapsyrys berildi, qarajat bólinisimen-aq iske kirisemiz», - dedi shahar basshysy.
Qala ákiminiń aıtýynsha, jol jabyndysynyń sapasy erekshe baqylaýǵa alynbaq. Qar tolyq erip ketkennen keıin 2021-2022 jyldary jóndelip, tapsyrylǵan joldar tolyq zerttelmek.
«Men ózim mamandarmen birge júremin. Eger de olqylyq anyqtalsa, birden kinárat-qýynym jumysyn qolǵa alamyz», - dedi Rýslan Ańbaev.
