Petropavlda bıyl 300-den astam nemis aýyl sharýashylyǵy tehnıkasy qurastyryldy
Kásiporyndy damytý jáne jınaqtaýshy ári qosalqy bólshekterdi shyǵarý máselesi talqylandy, dep habarlaıdy QazAqparat tilshisi.
Soltústik Qazaqstan oblysyna CLAAS kompanııasynyń basshysy Katrına Klaas-Mıýlhoızer jumys saparymen keldi. Bul jaıynda SQO ákimi Qumar Aqsaqalov áleýmettik jelidegi jeke paraqshasynda jazdy.
«Kompanııa basshysynyń Petropavlǵa kelýi - jobaǵa úlken kóńil bólip otyrǵandyǵyn kórsetedi. CLAAS basshylyǵymen kelissózder 2017 jyly bastaldy. Jobany júzege asyrýǵa Prezıdent Qasym-Jomart Toqaevtyń Germanııaǵa 2019 jyly barýy jáne Katrına Klaaspen kezdesýi mańyzdy serpin berdi», - dedi Qumar Aqsaqalov.
CLAAS – aýylsharýashylyq tehnıkasynyń álemdegi úzdik óndirýshisi.
Óńir basshysynyń aıtýynsha, el dıqandary tehnıkanyń sapasyn joǵary baǵalap otyr. Onyń bir mysaly retinde «Ashat Agro» JShS alqabynda 30 jyl boıy egin oryp júrgen CLAAS Dominator kombaınyn aıtýǵa bolady. 1992 jyldan beri kombaın 12 myń saǵat jumys istegen, áli de alqap basynda toqtaýsyz júr.
«Bizdiń mindetimiz - aýylsharýashylyq taýar óndirýshilerin sapaly jáne joǵary ónimdi, ári baǵasy naryqtan tómen tehnıkamen qamtamasyz etý. Bul dıqandarǵa egindi ońtaıly ýaqytta egip, jınap alýy úshin kerek. Tehnıkany jańartpaı aýyl sharýashylyǵyn damytý múmkin emes. Men aýyl sharýashylyǵy ınjeneri retinde muny jaqsy bilemin.
Búginde nemis kompanııasynyń kombaındary men traktorlary úlken suranysqa ıe. Nemis kompanııasynyń Petropavlda zaýyty ashylýy nátıjesinde tehnıkanyń baǵasy 27 % deıin tómendetildi. Kásiporyn ótken jyly 92 tehnıka qurastyrsa, bıyl sany 300-den asty. Kelesi jyly 500 tehnıka qurastyrý josparda bar», - dep jazdy Qumar Aqsaqalov.
