Petropavlda bıyl 14 kóp qabatty turyn úı kúrdeli jóndeýden ótedi
PETROPAVL. QazAqparat – Petropavlda kóktemde bastalǵan abattandyrý jumystary aıaqtalýǵa jaqyn, ómir súrýge jaıly qala bolýy úshin jyl saıyn qyrýar jumys atqarylyp keledi, dep habarlaıdy QazAqparat tilshisi.
Bıyl da Petropavlda joldar jóndelip, turǵyn úılerdiń shatyrlary men aýlalary jónge keltirilip jatyr. Sondaı-aq jylý jelileri men sýaǵarlar aýystyrylyp, tegin avtoturaqtar salyndy. Soltústik Qazaqstan oblysynyń ákimi Qumar Aqsaqalov shaharda atqarylyp jatqan jumystardyń sapasyn kórdi. Bul jaıynda ol áleýmettik jelidegi paraqshasynda jazba qaldyrdy.
«Oblys ortalyǵynda kóktemde bastalǵan jóndeý naýqany aıaqtalýǵa jaqyn. Óńir ekonomıkasynyń damýy oblystyq bıýdjetten qala qazynasyn toltyrýǵa múmkindik beredi.⠀
Sońǵy 5 jylda Petropavldyń bıýdjeti 37 mlrd-tan 67 mlrd teńgege deıin ósti, ıaǵnı 1,8 esege ulǵaıdy. Osynyń arqasynda qalany abattandyrý boıynsha aýqymdy jumystar júrgizilip jatyr. 5 jylda osy maqsatqa shamamen 7 mlrd teńge bólindi. Bul qarajat aýlalardy jóndeýge, balalar men sport alańdaryn ornatýǵa, alańdardy, aqysyz avtoturaqtar men jaıaý júrginshiler jolyn jabdyqtaýǵa jumsaldy», - dedi Qumar Aqsaqalov.
SQO ákiminiń aıtýynsha, 4 jyl ishinde Petropavlda 386 aýla jóndeldi. Bıyl jospar boıynsha taǵy 60 aýla jónge keltirilýi kerek bolsa, is júzinde 78 aýla jóndeldi. 261 jańa balalar alańqaıyna bıyl taǵy 60 oıyn alańy qosylady.
«Biz bıyl úılerdi jańǵyrtý baǵdarlamasyn qaıta júzege asyra bastadyq. Qalada 14 kópqabatty úı kúrdeli jóndeýden ótedi. 8 kópqabatty úıde jańa lıftter paıda bolady», - dedi SQO ákimi.
