Petropavlda bıyl 1300 tal egiledi
PETROPAVL. QazAqparat – Petropavlda mamyrdyń sońyna deıin kógaldandyrý jumystary aıaqtalady. Qazir oblys ortalyǵyna úsh túrli gúl men 5 túrli aǵash otyrǵyzylyp jatyr, dep habarlaıdy QazAqparat tilshisi.
Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń málimetinshe, oblys ortalyǵynda gúl otyrǵyzý jumystary 4 mamyrdan bastaldy. Bıyl 3 túrli - shyraıgúl, bozǵaldaq pen barqytgúl egilmek. Gúlder barlyq saıabaqtarǵa, gúlzarlarǵa, Qazaqstan Konstıtýtsııasy kóshesiniń boıyna, Jeńis saıabaǵyna jáne Pestroe kóliniń mańyna otyrǵyzylmaq.
«Gúlderdi mamyrdyń sońyna deıin egip bitirý josparlanǵan. Budan basqa qazir kógaldandyrý jumystary da júrgizilip jatyr. Petropavldyń 35 kóshesine aǵash otyrǵyzylady. Bıyl qaıyń, qaraǵaı, shyrsha, jóke, pıramıda tárizdes terekke basymdyq beriledi. Aǵashty mamyr aıynyń sońyna deıin otyrǵyzyp bolady», - deıdi Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń baspasóz hatshysy Ásem Aıtýlova.
Kóshet otyrǵyzý jumystary sáýir aıynda bastaldy. Bıyl Petropavl kóshelerine 1300-den astam aǵash jáne byltyrǵy jumystar jalǵasyn taýyp, 14 myńnan astam metrge buta-terek otyrǵyzylmaq.
