Petropavlda bıyl 1 mlrd teńgege 26 kópqabatty úı jóndeledi
Petropavl ákimi Bolat Jumabekovtyń aıtýynsha, jańa baspana qurylysymen qatar oblys ortalyǵynda eskirgen kópqabatty úıler de jónge keltirilip jatyr. Byltyr respýblıkalyq bıýdjetten 980 mln teńge bólinip, 18 kóp qabatty úı jóndelgen.
«2020-2025 jyldarǵa arnalǵan «Nurly jer» memlekettik baǵdarlamasynyń bir baǵyty – turǵyn úı-kommýnaldyq sharýashylyqty jańǵyrtý jáne jalpy qoldanystaǵy kondomınıým nysandary múlkin qalpyna keltirý. Byltyr osy baǵdarlama aıasynda 13 kóp qabatty úıdiń shatyry kúrdeli jóndeldi. 5 úıde 10 lıft aýystyryldy. Sonyń ishindegi 4 lıft 25 jyl boıy jumys istemegen eken. Bul jumystar turǵyn úılerde kezekpen atqarylady», - deıdi qala basshysy.
Bıyl osy maqsatqa respýblıkadan 1 mlrd teńge bıýdjettik nesıe bólindi. Ol qarajatqa 26 kópqabatty úıdi jónge keltirý josparlanǵan. Qazirgi ýaqytta jobalyq-smetalyq qujattary ázirlenip jatyr.
Tizimge qaı kóp qabatty úılerdiń kirgenin Petropavl qalalyq ákimdiginiń resmı saıtynan bilýge bolady.
Bolat Jumabekovtyń aıtýynsha, múlik ıeleri birlestikterin jáne jaı seriktestikterdi qurý boıynsha da jumystar jalǵasyp jatyr.
«Qazirgi ýaqytta Petropavlda 1070 kóppáterli turǵyn úı bar. Solardyń 790-y múlik ıeleri birlestikterin jáne jaı seriktestikterdi qurdy. Jańa zańnamaǵa sáıkes 2022 jyldyń 1 shildesine deıin basqarýdyń barlyq eski nysandary jańalaryna kóshýi tıis ekenin atap ótkim keledi. Osyǵan baılanysty qalalyqtardan osy baǵyttaǵy jumysty jandandyrýdy suraımyn.Artyqshylyǵy kóp. Naqty bir úıge bir shot jasalady. ıAǵnı, turǵyndar jınaǵan qarajat tek olardyń ortaq múlkine jumsalady. Al birlestik tóraǵasy aı saıyn turǵyndarǵa atqarylǵan jumystar týraly esep beredi», - deıdi Petropavl ákimi.
