Petropavlda birneshe turǵyn arzan taýar alamyn dep alaıaqqa uryndy
PETROPAVL. QazAqparat – Petropavlda birneshe adam arzanǵa taýar alyp, oljaǵa kenelemin dep alaıaqtyń arbaýyna tústi, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl polıtsııasyna alaıaqqa aldanǵan birneshe turǵyn aryzdandy. Qala turǵyndary 60 myńnan 700 myń teńgege deıingi túrli somalardy beıtanys adamǵa senip berip, san soǵyp qalǵan.
Olardyń bireýi kezdeısoq adammen sóılese kele, odan qurylys materıaldaryn tómen baǵamen satyp alyp, bazar baǵasymen saýdalaý arqyly ońaı oljaǵa kenelýge bolatynyn estigen. Qala turǵyny «arzan» qurylys materıaldaryn satyp alýǵa oǵan eki ret aqsha bergen. Sondaı-aq, jańa tanysynyń tereze ornatatynyn bilip, onyń qyzmetine aldyn ala tólem de jasaǵan. Endi ne taýar, ne tereze, ne aqshany kórmegen jábirlenýshi alaıaqqa jem bolǵanyn aıtyp, polıtsııaǵa júgindi.
Taǵy bir qala turǵyny arzan baǵamen benzın talonyn almaqshy bolyp, aqshasynan aıyrylǵan. Ol da jańaǵy alaıaqqa aldanyp qalypty.
Polıtsııaǵa taǵy bir petropavldyq dosyna aryzdanyp keldi. Joldasym dep júrgen tanysy odan jańa dóńgelekterge aqsha surap alyp, qaryzyn qaıtarmaǵan. Kúdiktiniń ústinen polıtsııaǵa 5 aryz kelip tústi.
Atalǵan faktiler «Alaıaqtyq» baby boıynsha Sotqa deıingi tergep-tekserýdiń biryńǵaı tizilimine engizildi. Tártip saqshylary buryn osyndaı qylmys jasaǵany úshin sottalǵan 1983 jyly týǵan kúdiktini ustady.
«Aldap-arbaýdyń tásilderi alýan túrli, alaıda, jábirlenýshilerdiń barlyǵyn biriktiretin bir nárse – beıtanys nemese az tanıtyn adamǵa senip qalyp, ońaı jolmen aqshalaryn eselegisi keletindikteri. Ádette, alaıaq qandaı da bir zatty bazardaǵydan tómen baǵamen alyp beremin dep sendirgen. Qazirgi ýaqytta tergeý amaldary júrgizilýde», - deıdi Petropavl qalalyq PB tergeý bólimi bastyǵynyń orynbasary Nurjan Omarov.
Jyl basynan SQO polıtseıleri 173 alaıatyq deregin ashty.
