Petropavlda birneshe kólik pen adam tonady degen kúdikpen eki aqmolalyq ustaldy
PETROPAVL. QazAqparat – Petropavlda birneshe múliktik qylmys jasaǵan Aqmola oblysynyń eki turǵynyn ustaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, alǵashqy aryz polıtsııaǵa tamyz aıynyń sońynda kelip túsken. Úıine kele jatqan mas petropavldyqtan bireý qolyndaǵy barsetkasy men uıaly telefonyn tartyp áketken.
Bul derek «Tonaý» baby boıynsha Sotqa deıingi tergep-tekserýdiń biryńǵaı tizilimine engizildi. Jedel ýákilder jaqyn mańdaǵy kameralardyń jazbalaryn, kúmándi tulǵalardy tekserdi. Nátıjesinde kúdikti ekeý «Izýmrýd» saıajaı qoǵamyndaǵy úılerdiń birinen ustaldy. Saıajaıdy tekserý kezinde magnıtola, avtokolonkalar, balyq aýlaý quraldary, kiltter jıyntyǵy jáne zergerlerge arnalǵan kózildirikter tabyldy.
Aqmola oblysynyń 1989 jáne 1995 jyly týǵan turǵyndary zattardy qaıdan alǵandyǵy jaıynda jóndi jaýap bere almady. Olar er adamǵa shabýyl jasap qana qoımaı, kólikterdi buzyp kirip, tonap otyrǵan.
Ustalǵandardyń sózine qaraǵanda, olar Petropavlǵa nápaqa tabý úshin kelgen. Alaıda jumys izdeýdiń ornyna urlyqty kásip etipti. Túndeletip aýlada dabylqaqqyshy joq kólikterdi tonaǵan. Ońaı «oljany» ózderi turyp jatqan tanystarynyń saıajaıyna aparyp otyrǵan.
«Kúdiktilerdiń osy ýaqytqa deıin úsh kólikti tonaǵany anyqtaldy. Qazirgi ýaqytta urlanǵan múlik tárkilendi. Ustalǵandar tergeý ızolıatorynda, tergeý áreketteri júrgizilýde. QR Qylmystyq kodeksiniń 191-baby jáne 188-baby boıynsha sotqa deıingi tergeý bastaldy», - deıdi Petropavldaǵy Birinshi polıtsııa bóliminiń bastyǵy Tilegen Áljanov.
