Petropavlda birneshe dúkendi tonaǵan kúdikti ustaldy
PETROPAVL. QazAqparat – Petropavl qalasynda polıtseıler birneshe dúkendi tonady degen kúdikpen 28 jastaǵy turǵyndy ustady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, qyrkúıek aıynyń basynda Petropavldaǵy «Sem» azyq-túlik dúkeni kassasynan túnde aqsha urlanady. Ury saýda nysanyna terezeni ashyp túsken.
«Osyǵan uqsas urlyq eki aptadan keıin oblys ortalyǵyndaǵy «Mır odejdy» saýda ortalyǵynda jasaldy. Onda da qaraqshy tereze arqyly tústi. Jedel is-shara nátıjesinde osy qylmysqa qatysy bolýy múmkin kúdiktini anyqtadyq. Petropavl qalasynyń 28 jastaǵy turǵyny buryn urlyq jasaǵany úshin jazasyn ótegen», - dedi Petropavl qalalyq polıtsııa basqarmasynyń birinshi bólim bastyǵy Balabek Jaqın.
Qazirgi ýaqytta sotqa deıingi tergeý júrip jatyr. Qylmysy dáleldengen jaǵdaıda oǵan 3 myń AEK mólsherinde aıyppul salynady nemese 1 myń 200 saǵatqa qoǵamdyq jumystarǵa jegiledi. Eń joǵary jaza – 5 jylǵa deıin bas bostandyǵynan aıyrý.
Petropavl qalalyq polıtsııa basqarmasy tergeý bóliminiń bastyǵy Ómirbek Janalınovtiń aıtýynsha, saýda oryndarynda jasalatyn qylmystyq ister jıi kezdesedi. Tek bıyl tergeý bólimine onnan astam is túsken.
«Urylardyń is-áreketi kóp jaǵdaıda uqsas keledi. Máselen, olar satyp alýshy retinde kıim ólsheıtin bólmege birneshe kıimdi alyp kiredi. Sol jerde chıpterdi sheship, ústerine qat-qabat kıedi. Tez ketýge asyqqan mundaı urylar ádette saýda úıinen shyqpaı jatyp ustalady. Al qashyp ketkenderin jedel is-shara barysynda alysqa uzatpaı qolǵa túsiremiz», - deıdi Ómirbek Janalınov.
