Petropavlda birneshe dúkendi tonaǵan qaraqshylar ustaldy
PETROPAVL. QazAqparat – Petropavlda bir kúnde birneshe shaǵyn azyq-túlik dúkenderin tonady degen kúdikpen eki er adam ustaldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavldaǵy azyq-túlik dúkenderiniń ıelerinen bir kúnde bir-birine uqsas stsenarıı boıynsha jasalǵan urlyq jóninde úsh aryz kelip tústi.
Medıtsınalyq maska taqqan eki er adam shaǵyn azyq-túlik dúkenderine kirip, paketke azyq-túlikti toltyryp alǵan soń, bireýi satýshyny sózge tartqan. Sol kezde ekinshisi taýardy alyp izin sýytyp otyrǵan. Dúkende qalǵan sybaılasy satýshyǵa aıaýshylyq tanytyp, tipti satýshymen birge urynyń sońynan qýa júgirgen syńaı bildirgen.
Endi bir jaǵdaıda olardyń bireýi talap etilgen jeke kýáligine ketken bolyp syrtqa shyqsa, ekinshisi paketti ala sala onyń sońynan qashqan.
Satýshylar polıtsııaǵa júginip, áleýmettik jeli arqyly dúkenderdiń birindegi beınekameraǵa túsken beınejazbany jarııalady. Urylar maska taqqan olardy eshkim tanymaıdy dep oılaǵan eken. Petropavl polıtseıleri beınejazbalardy muqııat zerdelep, nátıjesinde urlyqqa qatysy bolýy múmkin kúdiktilerdi anyqtady. Olardyń bireýi Jumysshy kentiniń 30 jastaǵy, buryn sottalǵan turǵyny bolyp shyqty. Kúdiktiler vokzal mańyndaǵy páterden ustaldy.
Qazirgi ýaqytta «Urlyq» jáne «Tonaý» baptary boıynsha sotqa deıingi tergep-tekserý júrgizilýde. Kúdiktiler úsh faktini de moıyndady.
