Petropavlda birneshe baspanany tonaǵan kúdikti ustaldy
PETROPAVL. QazAqparat – Petropavlda ury jeke turǵyn úıdi tonap, 4 mln teńgeni qoldy qyldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, polıtsııaǵa Petropavldaǵy «Bereke» yqshamaýdanyndaǵy jeke menshik úıdiń turǵyny júginip, kúndiz saǵat 15.00 shamasynda bireýdiń onyń úıine terezeden kirip, 4 mln jýyq teńgesin alyp ketkendigin habarlaǵan. Jábirlenýshiniń aıtýynsha, urlyq úıdegilerdiń barlyǵy jumysta bolǵan kezde jasalǵan. Onyń úıiniń aýmaǵy boıynsha beınebaqylaý kameralary ornatylǵan.
Jedel-izdestirý is-sharasy barysynda baspana urlyǵyna qatysy bar kúdikti anyqtalyp, oblys ortalyǵynyń 49 jastaǵy turǵyny ustaldy. Osyǵan uqsas qylmystar jasaǵany úshin ol buryn birneshe ret sottalǵan. Urlanǵan aqshanyń bir bóligi alyndy.
Atalǵan fakti QR Qylmystyq kodeksiniń 188-baby 3-bóligi «Urlyq» boıynsha Sotqa deıingi tergep-tekserýlerdiń biryńǵaı tizilimine engizildi. Ustalǵan kúdikti qamaýǵa alynyp, tergeý júrgizilip jatyr. Onyń osyǵan uqsas ózge de qylmystardy jasaýǵa qatysy bary tekseriledi. Búgingi tańda er adam jeke úılerdi tonaýdyń úsh epızody boıynsha kinásin moıyndady.
Jyl basynan SQO-da 270 astam páter urlyǵy tirkelip, onyń jartysynan kóbi ashyldy.
