Petropavlda birer kúnde jalǵa beriletin páter baǵasy kúrt qymbattady
PETROPAVL. QazAqparat – Petropavlda jańa oqý jyly qarsańynda jalǵa beriletin páter baǵasy kúrt qymbattap ketti, dep habarlaıdy QazAqparat tilshisi.
Soltústik Qazaqstan ýnıversıteti stýdentteriniń belgili bir bóligin ǵana jataqhanamen qamtymaq. Epıdemıologııalyq jaǵdaıǵa baılanysty jatyn oryn sanyn eki ese qysqartýǵa májbúr bolǵan.
«Ýnıversıtette 897 adam grantqa oqıdy. 579 adam «Serpin» baǵdarlamasy boıynsha oqıdy. Qazir biz birinshi kýrs stýdentterin ornalastyryp bolýǵa jaqynbyz. Jeńildigi bar ekinshi kýrs stýdentterin jataqhanaǵa ornalastyra bastadyq. Bas memlekettik sanıtar dárigerdiń qaýlysyna sáıkes jataqhanaǵa ornalastyrǵanda sanıtarııalyq normalar saqtalýy qajet. Qazir bizge ákimdik te kómektesip jatyr. Qosymsha taǵy 300 oryn tabyldy. Osylaısha 1 kýrs jáne jeńildigi bar stýdentter boıynsha qajettilikti tolyq jabamyz dep oılaımyn. 16-17 sharshy metr bolatyn bólmege buryn 3 adam ornalasatyn. Qazir sanıtarııalyq talaptarǵa baılanysty mundaı bólmelerde tek 2 adam ǵana turady», - deıdi ýnıversıtettiń akademııalyq suraqtar boıynsha Basqarma múshesi Renata Apergenova.
Mamannyń aıtýynsha, joǵary oqý ornynyń 1512 jatyn orny bar. ıAǵnı, qazirgi jaǵdaıda onyń jartysyna – 756-syna ǵana ornalastyra alady.
«Eń aldymen grantqa oqýǵa túsken 1 kýrs stýdentteri bólme alady. Óıtkeni olardyń basym bóligi kámelet jasqa tolmaǵan jasóspirimder. Ekinshi kezekte kvotasy jáne jeńildigi barlar alady. Iıa, bizdiń stýdentterge jataqhanada oryn jetispeıdi. Óıtkeni ýnıversıtette granttan basqa aqyly oqıtyn stýdentter de bar», -deıdi Renata Apergenova.
Máseleni sheshý úshin ata-analardyń, stýdentterdiń ortaq chaty qurylǵan. Olar bir-birine kómektesýge tyrysyp jatyr, jalǵa beriletin bólme, páter jaıynda aqparmen bólisedi.
«Qazirgi ýaqytta Petropavlda jalǵa beriletin páterlerdiń baǵasy qoldan kóterilip otyr. Keı rıeltorlar jaǵdaıdy paıdalanyp, jastarǵa páterdi kórsetkeni úshin jáne belgili bir somaǵa kelisimge otyrǵany úshin ǵana aqy alǵan.
Eger ótken aptada bir jatyn oryndy táýligine 2,5 myń teńgege tabýǵa múmkin bolsa, al páter 4,5 myń teńgege jalǵa berilse, osy aptada bir bólmeli páterdiń baǵasy 10 myń teńgege deıin ósip ketken. Árıne, mundaı somany stýdenttiń qaltasy kótermeıdi. Oblys aýdandarynan kelip oqıtyndar bar, olar ádette barlyq stýdentterdiń jartysy. Mundaı stýdentterdiń Petropavlda týystary, tanystary bar, solardyń úıinde turyp oqı alady. Negizinen úshten biriniń baratyn jeri joq», - deıdi ýnıversıtet ókili.
