Petropavlda biregeı ekologııalyq saıabaq boı kótermek
PETROPAVL. QazAqparat – Petropavldaǵy Meşan ormanynda bıyl elde teńdesi joq biregeı ekologııalyq park salynady, dep habarlaıdy QazAqparat tilshisi.
Petropavlda Meşan ormanynda zamanaýı ekologııalyq saıabaq salynbaq. Jobalaý jumystary qańtar aıynda bastaldy. Qazir jobalyq-smetalyq qujattary ázirlenip jatyr. Kún jylynysymen ormannyń ortasynda qurylys bastalady.
Osylaısha óńirde Meşan ormanyna qatysty másele sheshimin tappaq. Óıtkeni kópshilik bul ormannyń taǵdyryna alańdaýshylyq bildirdi. SQO ákimi Qumar Aqsaqalov óziniń áleýmettik paraqshasynda aǵashtardyń endi kesilmeıtinin jetkizdi.
«2007 jyly kommertsııalyq turǵyn úı salý úshin Meşan ormanynan jer ýchaskesi berildi. Biz kesýdi toqtatyp, bul jerdi memleket menshigine qaıtardyq.
Bıyl biz osy kesilgen aýmaqta ekologııalyq park qurylady. Yńǵaıly oryndyqtar qoıylyp, demalý buryshtary jasalady. Sport alańdary men jattyǵý keshenderi paıda bolady. Kishkentaı demalýshylarǵa oıyn alańqaıyn jasaımyz. Velosıped jolaqtary ótedi. Shaǵyn arhıtektýralyq formalar ornatylady. Jańa ekopark sportshylardyń, belsendi jastardyń jáne tabıǵatty jaqsy kóretin adamdardyń súıikti demalys ornyna aınalady», - dep jazdy Qumar Aqsaqalov.
Zamanaýı úlgide salynatyn bul saıabaqtyń jobasyn elordalyq «SHATYR GROUP» JShS jasap jatyr. Saıabaq 3 ga aýmaqty almaq.
«Zamanaýı ekologııalyq saıabaq sportqa negizdelgen. Saıabaqta trenajerler, vorkaýttar, balalar oıyn alańdary, júgirý joldary, fýtbol alańy bolady. Amfıteatr salynady, sýburqaqtar qoıylady. Negizgi jumystardy astanalyq mamandar júrgizgenimen, jumysqa jergilikti turǵyndar alynady», - deıdi «SHATYR GROUP» JShS jobalaýshysy Álibek Esdáýletov.
Óńir basshysy Qumar Aqsaqalov bolashaq saıabaqtyń beınejobasyn jarııalady.
Jalpy ekologııalyq saıabaqtyń qurylysy jyl sońyna deıin aıaqtalyp, paıdalanýǵa berilmek.
