Petropavlda bir túnde rekordtyq mólsherde qar shyǵaryldy
«Qazgıdromet» RMK Soltústik Qazaqstan oblysy boıynsha fılıalynyń málimetinshe, óńirde eki kúnde qańtar aıynyń normasy mólsherinde qar jaýǵan. Sonyń ishinde Esil aýdanynyń Korneevka eldi mekeninde 26 mm, Tımırıazev aýdanynda 25,5 mm aq ulpa túsken. Petropavldaǵy jaǵdaı da máz emes.
Boran saldarynan qala kóshelerinde qozǵalys qıyndaı tústi. Shahardy qardan arshý úshin kommýnaldyq qyzmetter eki aýysymda jumys istedi.
Kúndiz kólik keptelisterin boldyrmaý maqsatynda jumysshylary qardy qolmen kúredi. Al aýyr tehnıka keshki saǵat 22.00-den bastap shyǵyp, tańǵy saǵat 5.00-ge deıin jumys atqardy.
«Qazan aıynan bastap 14 kásiporyn ózderine bekitilgen ýchaskelerden 57 myń tekshe metr qar shyǵardy. Al sol mólsherdiń jartysyna jýyǵyn – 22 myń tekshe metr qardy bir túnde shyǵardy. Bul - rekordtyq kórsetkish. Maýsym bastalǵaly osymen tórtinshi ret qala syrtyna qar shyǵaryp otyrmyz», - deıdi Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń baspasóz hatshysy Ásem Aıtýlova.
Kommýnaldyq qyzmet ókilderiniń aıtýynsha, turǵyndar tarapynan kóshelerdiń qardan tazartylýyna qatysty syn jıi aıtylady. Olarǵa jumysty sapaly atqarýǵa kóp jaǵdaıda jol jıegine qaldyrylǵan kólikter kedergi keltiredi eken.
«Qar shyǵarý jumystary búgin de jalǵasady. Atqaratyn jumys aýqymdy. Sol sebepti turǵyndardan keshke jol boıynda kólikterin qaldyryp ketpeýdi suraımyz. Bul aýyr tehnıkanyń jumysyna kedergi ákeledi. Saldarynan sol aýmaqtaǵy qar shyǵarylmaı qalady», - deıdi qalalyq ákimdik ókili.
Ásem Aıtýlovanyń aıtýynsha, byltyr osy aralyqta Petropavldan 65 myń tekshe metr shyǵarylǵan.
