Petropavlda bir túnde eki kólik urlaǵan jigit ustaldy
PETROPAVL. QazAqparat – Petropavlda 20 jastaǵy jigit eki turǵynnyń ashyq qaldyrǵan mashınasyn aıdap áketti, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, eki qylmys ta Petropavldaǵy Bereke yqsham aýdanynda jasalǵan. Tańerteń kóligin ornynan tappaǵan turǵyndar birden polıtsııaǵa júgingen. Tártip saqshylary úı-úıdi aralap, kórshilerden jaýap aldy, qylmys ornynan jaqyn jerde ornalasqan baqylaý kameralaryn tekserdi. Beınejazbalardan qylmysty bir adamnyń jasaǵany anyqtaldy.
Kólik urlaýǵa qatysy bolýy múmkin degen kúdikpen sol kúni Petropavldyń 20 jastaǵy turǵyny ustaldy. Al avtokólikter Bereke aýdanynyń shetindegi ormannan tabylyp, ıelerine qaıtaryldy.
«VAZ 2106 jáne Opel Vectra kólikteri qoldy bolǵan. Polıtsııa kúdiktini izin sýytpaı anyqtap, ustady. Qazirgi ýaqytta eki fakti de Sotqa deıingi tergep-tekserýdiń biryńǵaı tizilimine «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» baby boıynsha engizildi, tergeý júrgizilýde», - deıdi Petropavl qalalyq polıtsııa basqarmasy ekinshi polıtsııa bólimi bastyǵynyń orynbasary Samat Tastan.
Ustalǵan jigit buryn uqsas qylmys jasaǵany úshin sottalǵan. Sol túni mas bolǵan. Qazirgi ýaqytta polıtseıler kúdiktiniń uqsas qylmystarǵa qatysyn tekserýde.
Aıta keteıik, Bereke aýdanynda aıdap áketilgen eki avtokólik te qulyptalmaı turǵan, ne otaldyrý qulpynda kilti qalǵan.
