Petropavlda bir top jasóspirim kottedj jaldap, týǵan kún toılaǵan
Soltústik Qazaqstan oblysy polıtsııa departamenti baspasóz qyzmetiniń málimetinshe, óńirde karantın engizilgeli «Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» baby boıynsha 700-den astam quqyq buzý faktisi anyqtaldy.
Petropavlda Ýlıanov kóshesindegi kottedjin jalǵa bergen úı ıesi endi aıyppul tólemek. Reıd kezinde keshki saǵat 21.00 shamasynda polıtseıler kottedjde dosynyń 18 jasqa tolýyn toılap jatqan jastardy anyqtaǵan.
Qonaqtardyń jartysy - 15-17 jastaǵy jasóspirimder. Karantınge baılanysty adam kóp jınap, toı-tomalaq ótkizýge tyıym bar. Sol sebepti kesh toqtatyldy. Úıden 4 bes lıtrlik ydysqa quıylǵan alkogol ónimi tabyldy.
Saýyq keshtiń barlyq qatysýshylary ákimshilik jaýapkershilikke tartylady. Kámeletke tolmaǵandar úshin ata-anasy jaýap beredi.
Reıd barysynda kóńil kóterý oryndary da nazardan tys qalmady. Nátıjesinde saǵat 23.00-den keıin jumys istep turǵan Kırpıchnaıa kóshesindegi «Pavlın» dámhanasy anyqtaldy.
Sondaı-aq, monıtorıng toby shamamen túngi saǵat 03.00-de «Royal palace» oıyn-saýyq kesheniniń karaoke-barynda ketýge asyqpaı, bas qosyp otyrǵan qala turǵyndarynyń ústinen tústi. Kóńil kóterý oryndarynyń ıelerine karantındik sharalardy buzǵany úshin materıal jınastyryldy.
«Oblystyń bas sanıtar dárigeriniń qaýlysynyń oryndalýyn baqylaý mindeti polıtsııaǵa júkteldi. Kóńil kóterý oryndarynyń basym bóligi jaǵdaıǵa zor jaýapkershilikpen qarap, belgilengen talaptardy qatań ustanýda. Osyǵan qaramastan, qazirgi ýaqytta talaptardy túsindirý boıynsha profılaktıkalyq is-sharalar kúsheıtildi. Óıtkeni karantın talaptaryn óreskel buzý derekteri áli de bar»,- dedi Petropavl qalalyq polıtsııa basqarmasy bastyǵynyń birinshi orynbasary Álibek Ǵabdýllın.
Jalpy SQO-da bir aptada karantındi buzýǵa qatysty 27 derek anyqtaldy.