Petropavlda bir top jas oıynshyq avtomat ustap, kóshege shyqqan
PETROPAVL. QazAqparat – Petropavlda oıynshyq avtomat ustap júrgen jastar anyqtaldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, oqıǵa búgin keshki saǵat 22.00 shamasynda Petropavldaǵy Qazaqstan Konstıtýtsııasy men Altynsarın kósheleriniń qıylysyndaǵy avtoturaqta bolǵan. Bul jer – polıtseılerdiń udaıy nazarynda. Jastar jıi jınalatyndyqtan, turǵyndardan únemi shaǵym túsedi. Bul joly Jedel basqarý ortalyǵynyń qyzmetkerleri beınekamera arqyly avtomat ustaǵan bozbalany ózimen zamandas bir top jastyń arasynan baıqap qalady.
Ol jerge birden Petropavl qalalyq polıtsııa basqarmasynyń qyzmetkerleri jetti. Avtomattyń oıynshyq ekenine kóz jetkizgen tártip saqshylary jastarmen profılaktıkalyq áńgime júrgizdi. ıAǵnı jasóspirimderge saǵat 23.00-den keıin ata-anasyz júrýge bolmaıtynyn, karantın talaptaryn saqtaý qajettigin jáne toptasýǵa tyıym salynǵanyn eskertti.
«Jedel basqarý ortalyǵy beınekameralarynyń quqyqtyq tártipti saqtaýda atqarar róli zor. Olar qoǵamdyq jáne jol qozǵalysyndaǵy qaýipti ýchaskelerdi baqylaýǵa alǵan. Jumys barysynda túrli, keıde tipti kúlkili jaǵdaılar bolyp jatady. Biraq biz qaýip týdyrýy múmkin onyń árqaısyn tekserýge mindettimiz», - deıdi Petropavl qalalyq polıtsııa basqarmasy jedel basqarý ortalyǵynyń bastyǵy Nurlan Muhametjanov.
