Petropavlda bir táýlikte 650-ge jýyq saıajaı ýchaskesi sý astynda qaldy

PETROPAVL. QazAqparat – Petropavlda Esil ózeniniń tasýynan sý basqan saıajaı ýchaskeleriniń sany 700-ge jýyqtady. Ózen sýynyń deńgeıi áli kóterilip jatyr, dep habarlaıdy QazAqparat tilshisi.

Petropavlda Esil ózeniniń tasýynan ótken táýlikte 30 saıajaı ýchaskesi sý astynda qalǵan edi. Búgin olardyń qataryna taǵy 642-si qosyldy.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, sý basqan saıajaı ýchaskeleriniń 148-i Zarechnyı kentindegi «Trýd», «Satýrn», «Stroıtel» jáne «Renet» saıajaı qaýymdastyqtarynda ornalasqan.

Taǵy 302 ýchaske Rechport aýmaǵyndaǵy úsh saıajaı qaýymdastyǵyna tıesili.

Al Hromzaýyt aýdanyndaǵy «Elegııa» saıajaı qaýymdastyǵynda - 19, «131 km» dep atalatyn aýdanda – 24, Mıchýrıno eldi mekenindegi «Pervenetste» 67 ýchaske sý astynda qaldy.

Sondaı-aq, balyq tálimbaǵy aýdanynda – 33, «Ýchıtel 1,2,3» saıajaı qoǵamdastyqtarynda – 98, «Býrevestnıkte» - 51, «Izýmrýdta» - 21 saıajaı ýchaskesi sýda tur.

Mamandardyń aıtýynsha, Esil ózeniniń tasýynan turǵyn úılerge sý kirgen joq, ıaǵnı zardap shekkender tirkelmedi.

Al «Chelıabi-Novosibir» halyqaralyq mańyzy bar avtojoly áli jabyq. Munda trassa ústinen ótken sýdyń tereńdigi 55 sm, uzyndyǵy 250 metrge jetti.

17 sáýir kúni Zarechnyı kentine baratyn ekinshi avtojoldy sý basty. Onyń tereńdigi 17 sm bolsa, jaıylǵan uzyndyǵy 70 metr.