Petropavlda bir kúnde karantın tártibin buzǵan 19 kásipker anyqtaldy
PETROPAVL. QazAqparat – Petropavlda tártip saqshylary kásipkerlerdiń karantındik sharalardy saqtaýyn tekserý úshin reıd uıymdastyrdy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, reıd Petropavl qalalyq taýarlar men qyzmetterdiń sapasy men qaýipsizdigin baqylaý basqarmasy mamandarymen birge júrgiziledi. Basty nazarǵa jolaýshylar kóligi, saýda oryndary alyndy. Nátıjesinde bir kúnde 46 nysan qamtylyp, jartysynda karantın talaptarynyń saqtalmaıtyny anyqtaldy.
Jeti avtobýs júrgizýshisi maska taǵý rejımin buzǵan. Taǵy bir júrgizýshiniń qolǵaby men sanıtaızeri bolmaı shyqty. Sondaı-aq, tekserýshiler úı astyndaǵy dúkenderdiń kireberisinde zararsyzdandyrylmaı, qurǵap jatqan kilemshelerdi anyqtady. Satýshylar kóp jaǵdaıda maskani tıisti túrde taqpaıdy nemese betperdesiz júredi eken. Dúkenderdiń birinde kezek kútken adamdar jınalyp qalǵan, talap boıynsha dúkenniń ishinde eki adamnan kóp bolmaýy tıis, qalǵandary áleýmettik araqashyqty saqtaı otyra, syrtta turýy kerek.
«Tótenshe jaǵdaı rejımi toqtatylǵanyna qaramastan, oblysta karantındik shekteýler kúshin joıǵan joq. Oblystyń geografııalyq ornalasýyn eskersek, kez kelgen ýaqytta qaýipti indet órshýi múmkin. Óńirdiń qaýipsizdigi birinshi kezekte, turǵyndardyń shekteýlerge jaýapkershilikpen qaraýyna baılanysty. Birlesken reıdtik is-sharalar aldaǵy ýaqytta da jalǵasady. Onyń maqsaty – karantın jaǵdaıyndaǵy júrip-turý mádenıetin qalyptastyrý», - deıdi SQO PD bastyǵy polıtsııa polkovnıgi Marat Tólebaev.
Reıd barysynda karantındik talaptardy saqtamaýdyń 19 deregi anyqtaldy. Tártip saqshylary jınalǵan materıaldardy hattama toltyrý úshin Taýarlar men kórsetiletin qyzmetterdiń sapasy men qaýipsizdigin baqylaý komıtetine tapsyrdy.
