Petropavlda bir kúnde 3 zeınetker alaıaqtardyń qurbany boldy
PETROPAVL. QazAqparat – Petropavl qalasynda 7 qyrkúıek kúni birden úsh zeınetker belgisiz bireýlerge aldanyp, jınaǵan aqshalarynan aırylyp qaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń habarlaýynsha, tártip saqshylaryna alaıaqtarǵa jem bolǵandyǵy jóninde Petropavldyń ártúrli aýdanynan úsh turǵyn aryzdanǵan. Úsheýinde de qylmyskerler bir jolmen oılaryn iske asyrypty.
80 jastaǵy zeınetkerge beıtanys áıel telefon soǵyp, senimine kire sóılesken. Áńgime barysynda odan Reseı Federatsııasynda týystarynyń bar-joqtyǵyn bilgen. Oń jaýap alǵannan keıin solardyń ótinishi boıynsha habarlasyp turǵanyn, týystaryna aqshalaı kómek kerek bop jatqanyn, al aqshany ortaq tanystary áketetinin aıtqan. Kóp uzamaı kelgen er adamǵa egde jastaǵy áıel 50 myń teńgesin ustatyp jiberipti. Tek sodan keıin sheteldegi týystaryna habarlasqan zeınetker óziniń alaıaqtarǵa jem bolǵanyn bilgen.
«Alaıaqtar úsh jaǵdaıda da egde jastaǵy áıelderdi tańdaǵan. Telefon arqyly beıtanys kelinshek olardyń ishi-baýyryna kire sóılesip, sońynda aqsha surap otyrǵan. Zardap shekken taǵy bir áıeldiń jasy 78-de. Ol jıǵan-tergen 500 myń teńgesin berip qoıǵan. Aqshany qaryzǵa berdim dep oılaǵan. Alaıaqtar psıhologııany jaqsy biledi. Qazir olardy ustaý maqsatynda barlyq is-sharalardy jasap jatyrmyz. Petropavl qalalyq polıtsııa basqarmasynyń jeke quramy qylmysty ashýǵa jumyldyryldy»,- deıdi SQO polıtsııa departamenti krımınaldy polıtsııa basqarmasynyń basshysy Petr Klımov.
SQO-da jyl basynan alaıaqtyqqa qatysty 307 fakti tirkelse, onyń 174-inde is sotqa deıin jetti.
