Petropavlda bir kásiporynda 40 jyl tiginshi bolǵan áıel marapattaldy
Іs-shara, uıymdastyrýshylardyń aıtýynsha, «Shyn júrekten» jobasynyń aıasynda ótti. Soltústik Qazaqstan oblysy ardagerler keńesi bul joly eńbegimen erekshelengen bes aýdannyń jáne Petropavldyń 7 eńbek ardagerin qurmetke bóledi.
Solardyń biri – «Progress» tigin fabrıkasynyń tehnology Raıhan Saǵyndyqova. Ol bul kásiporynda 40 jyl boıy eńbek etip keledi. Osy aralyqta tigin fabrıkasynyń birneshe ret ataýy ózgerdi, basshylary men ıeleri aýysty. Qıyn toqsanynshy jyldary da Raıhan Súleımenqyzy óz kásibine adal bolyp, mamandyǵyn aýystyrmady.
«2000 jyldardyń basy bizdiń kásiporyn úshin asa qıyn boldy. Eńbekaqyny azyq-túlikpen berdi. Sol jyldary kóbi basqa jumysqa ketti, fabrıkada 6 adam ǵana qaldyq. Biz onyń ótpeli kezeń ekenine, ýaqyt óte kele jaǵdaıdyń jaqsaratynyna sendik, súıikti isimizben aınalysa berdik», - deıdi Raıhan Saǵyndyqova.
Qazir bilikti maman tájirıbelik tsehty basqarady. Qol astyndaǵy mamandarmen jańa kıim úlgilerin ázirlep, burynnan baryn jetildiredi. Sondaı-aq óndiriske de jaýap beredi. Onyń qaramaǵynda 50 tiginshi bar.
«Bul mamandyqqa jastar kóbirek kelse eken degen tilegim bar. Qazir qyz-kelinshekter sándi mamandyqtardy tańdaıdy. Biraq, qol eńbegi qashan da joǵary baǵalanǵanyn umytpaý qajet. Sondyqtan bizge jumysqa shaqyramyn. Tigý bilmese – úıretemiz, tek ynta bolsa bolǵany. Eńbekaqy jaman emes, osy aıda taǵy da ósti», - deıdi tigin fabrıkasynyń tehnology.
«Men eńbegimmen maqtanamyn» atty saltanatty is-shara barysynda Raıhan Súleımenqyzynyń eńbegi kópke úlgi etildi. Oǵan jáne saltanatty jıynǵa qatysqan basqa da eńbek ardagerlerine syılyqtar tabys etildi. Kesh kontserttik baǵdarlamaǵa ulasty.
