Petropavlda bıyl otbasylyq-turmystyq qylmys boıynsha 21 is aıaqtaldy

PETROPAVL. KAZINFORM — Petropavlda otbasylyq-turmystyq qylmystar sany byltyrǵymen salystyrǵanda 13% kemigen. 

Petropavl qalalyq polıtsııa basqarmasy bastyǵynyń orynbasary Qaıyrbek Baımonkenovtyń aıtýynsha, jasalǵan 21 qylmystyq istiń 17-si áıelderge, bireýi kámeletke tolmaǵanǵa, 3-eýi er adamǵa qatysty.

— Er adamdarǵa qatysty qylmystardyń barlyǵy, áıelderge qatysty 17 qylmystyń 11-i mas kúıde jasalǵan.

21 qylmystyń túrlerine keler bolsaq, bir kisi óltirý faktisi, densaýlyqqa qasaqana aýyr zııan keltirýdiń 5 faktisi, bir densaýlyqqa qasaqana ortasha zııan keltirý jáne jeńil zııan keltirýdiń 3 faktisi, uryp — soǵýdyń 11 deregi tirkeldi, — deıdi Qaıyrbek Baımonkenov.

Budan bólek 8 aıda ákimshilik jaýapkershilikke 869 quqyqbuzýshy tartyldy, bul byltyrǵymen salystyrǵanda 15,3% kóp. Profılaktıkalyq esepke 1065 adam qoıylyp, onyń ishinde 872 qorǵaý uıǵarymy jáne sotpen 193 erekshe talaptar shyǵarylǵan.

— Qorǵaý nusqamasyn, erekshe talaptardy saqtamaǵandar bar. Olar jaýapqa tartyldy. Otbasy-turmystyq qatynastar salasynda ákimshilik quqyq buzýshylyq jasaǵan adamnyń minez-qulqyna erekshe talaptar belgilengen kezde sot oǵan psıhologııalyq kómek kórsetý jóninde sharalar belgileýge quqyly.

Materıaldardy sotqa jibergen kezde ýchaskelik polıtsııa ınspektory janjalqoıǵa psıhologııalyq kómek belgileý týraly ótinish jiberedi. Jyl basynan beri barlyǵy 12 quqyqbuzýshyǵa psıhologııalyq kómek kórsetildi, — deıdi Qaıyrbek Baımonkenov.

Sondaı-aq, bıyl polıtsııanyń senim telefonyna 28 áıel konsýltatsııa alý úshin júgingen, áńgimelesýden keıin 19 áıel polıtsııaǵa ótinish jazdy, nátıjesinde otbasy shyrqyn buzǵandar ákimshilik jaýapkershilikke tartyldy.

— Mamyr aıynan bastap Petropavl qalasy ákimdiginiń Otbasyn qoldaý ortalyǵy ashyldy. Qazir munda jaǵdaıy qıyn 3 otbasy turyp jatyr, — deıdi Qaıyrbek Baımonkenov.

Buǵan deıin Soltústik Qazaqstan oblysynda eki polıtsııa qyzmetkeri zardap shekken oqıǵaǵa baılanysty qylmystyq is qozǵalǵanyn jazǵan edik.