Petropavlda bıyl mas kúıde kóshede júrgen 57 jasóspirim anyqtaldy
PETROPAVL. KAZINFORM - Petropavlda demalys kúnderi polıtseıler jasóspirimderdiń túngi ýaqytta úıden tys jerde júrýiniń 19 faktisin tirkedi.
Soltústik Qazaqstan oblysy polıtsııa departamenti baspasóz qyzmetiniń málimetinshe, jaz - polıtseıler úshin jumystyń qyzatyn shaǵy. Tártip saqshylary jasóspirimderdiń qatysýymen bolatyn qaýipti jaǵdaılardyń aldyn alý maqsatynda turaqty túrde túngi reıdter júrgizedi.
Ásirese demalys kúnderi polıtseıler túngi kóshelerdi, oıyn-saýyq oryndaryn, saıabaqtardy, sondaı-aq kámeletke tolmaǵandar bolýy múmkin ózge de oryndardy tekseredi.
Máselen, ótken demalys kúnderi reıd barysynda kóshede túngi ýaqytta júrgen 19 jasóspirimderdi anyqtady. Ata-analaryna ákimshilik hattamalar toltyryldy.
Al N.Nazarbaev kóshesi boıynda polıtseılerden boı tasalap kele jatqan 15 jastaǵy qyz nazarǵa ilikti. Medıtsınalyq kýálandyrý onyń mas kúıde ekenin kórsetti. Osy fakti boıynsha qazir materıaldar jınalyp jatyr, endi onyń áke-sheshesi kámeletke tolmaǵandardyń isteri jónindegi komıssııa aldynda jaýap beretin bolady.
Jyl basynan beri Petropavlda polıtseıler jasóspirimderdiń túngi ýaqytta kóshede júrýiniń 375 faktisin, sondaı-aq 18 jasqa tolmaǵandardyń alkogoldik ishimdik ishýiniń 57 deregin anyqtady. Kámeletke tolmaǵandardyń isteri jónindegi komıssııanyń qaraýyna 51 materıal joldandy.
Buǵan deıin Óskemende jasóspirimder zaqymdap ketken aspaly kópirdi jóndeýge 21 mln teńge jumsalatynyn jazǵan edik.
