Petropavlda bıyl qansha adam 10 sotyq jerge qol jetkizedi

PETROPAVL. KAZINFORM – Petropavlda 10 sotyq jerge kezekke turǵandardyń sany 23 myńǵa jýyqtady. Kezek jyljyr emes.

Jeke turǵyn úı qurylysy úshin 10 sotyq jerge kezek Petropavlda 2003 jyly bastaldy. Petropavl qalalyq jer qatynastary bóliminiń málimetinshe, qazirgi ýaqytta tizimde 22 852 adam tur. 2013 jyldan bastap kezekte turǵandarǵa 1442 ýchaske berilgen. 

- Jer ýchaskelerin alǵan azamattardyń áleýmettik mártebesi kórsetilmeıdi, óıtkeni arnaıy esepke qoıý kezinde azamattar sanattarǵa bólinbeıdi jáne jer ýchaskesin alý úshin biryńǵaı kezekke turady.

2022 jylǵy 1 sáýirden bastap jer ýchaskesin alý kezektiligi elektrondyq formatta qalyptastyrylady. Endi 10 sotyq ýchaskege kezekke turý úshin EGOV portaly arqyly ótinish berý qajet, - deıdi Jer qatynastary bólimi basshysynyń mindetin atqarýshy Qaırat Eleýsizov.

Mamannyń aıtýynsha, 2024 jyly esepke 2 183 azamat alyndy, sol jyly 83 ýchaske turǵyndarǵa berildi. Byltyr tizim taǵy 1 431 azamatpen tolyqsa, 33 adam kópten kútken 10 sotyqqa qol jetkizdi. 

- Bıyl jyl bastalǵaly jeke turǵyn úı qurylysy úshin 33 jer ýchaskesi berildi. «Solnechnyı-2» jáne «Ońtústik» shaǵyn aýdandaryna ınjenerlik ınfraqurylym tartylyp bolǵannan keıin 1419 jer ýchaskesi beriletin bolady. Bul jumys bıylǵa josparlanǵan.

Ýchaskelerdi resmı bólý kezinde azamattardyń bir bóligine berilmeýiniń negizgi sebepteri: ınjenerlik ınfraqurylymnyń bolmaýy, rettelmegen jer-quqyqtyq máseleler, - deıdi Petropavl qalasy ákimdiginiń qurylys, sáýlet jáne qala qurylysy bólimi basshynyń orynbasary Sáken Ótebaev.

uǵan deıin jer ýchaskesine qatysty sheshimderdi onlaın alýǵa bolatyndyǵyn jazǵan edik.