Petropavlda bıyl 9 jasóspirim arnaıy mekemege oqýǵa jiberildi
PETROPAVL. KAZINFORM — Olardyń barlyǵy zań talaptaryn birneshe ret qasaqana buzǵan.
Soltústik Qazaqstan oblysy polıtsııa departamenti baspasóz qyzmetiniń málimetinshe, ótken senbige qaraǵan túni polıtsııa qyzmetkerleri Petropavlda habar-osharsyz ketken 13 jastaǵy jasóspirimdi izdedi. Tártip saqshylary balanyń tanystarynyń barlyǵyn tekserip, eski ǵımarattardy, garajdar ornalasqan aýmaqtardy jáne adam az júretin jerlerdi qarady. Nátıjesinde bala týystarynyń úıinen tabyldy.
Jasóspirim buǵan deıin de zań talaptaryn buzǵany úshin polıtsııanyń esebinde bolǵan. Ol kámeletke tolmaǵandardy beıimdeý ortalyǵyna ornalastyryldy. Sot sheshimi boıynsha balany arnaýly bilim berý uıymyna jiberý máselesi qarastyrylady. Jalpy, jyl basynan beri oblys ortalyǵynda zań talaptaryn buzǵan, úıden qashqan 9 jasóspirim osyndaı mekemelerge jiberilgen.
Demalys kúnderi ıývenaldyq polıtsııa qyzmetkerleri «Nazar aýdaryńyz: balalar!» reıdtik is-sharasyn jalǵastyrdy. Polıtseıler kóńil kóterý oryndaryn, kompıýterlik klýbtardy jáne jastar jıi baratyn basqa da oryndardy tekserdi. Sonymen qatar profılaktıkalyq esepte turǵan otbasylardy aralady.
Jyl basynan beri Petropavlda 20 erli-zaıypty ata-ana quqyǵynan aıyryldy, 13-iniń ata-ana quqyǵy shekteldi. Buǵan ádette eresekterdiń qoǵamǵa jat minez-qulqy, alkogoldi asyra paıdalanýy jáne kámeletke tolmaǵan balasyna tıisti baqylaý júrgizbeýi sebep bolady. Bes jaǵdaıda otbasylar túzelý jolyna túsip, ata-ana quqyqtaryn qalpyna keltirdi.
Buǵan deıin Qazaqstanda esirtki qylmysyna qatysy bar 69 jasóspirim ustalǵanyn jazǵan edik.
