Petropavlda bıyl 79 bala izdestirilip, aman tabyldy
PETROPAVL. KAZINFORM – Tek ótken demalys kúnderi tártip saqshylary 5 balanyń joǵalýyna qatysty jedel izdestirý is-sharasyn júrgizdi.
Soltústik Qazaqstan oblystyq polıtsııa departamenti baspasóz qyzmetiniń málimetinshe, bir jaǵdaıda erli-zaıypty janjaldasyp, áıeli eki jas balasyn alyp, úıden ketip qalǵan. Kúıeýi polıtsııaǵa habarlaýǵa májbúr bolǵan. Tekserý barysynda áıeldiń oblys aýdandarynyń birine ketkeni anyqtaldy. Qazir bul otbasy turmystyq zorlyq-zombylyqtyń aldyn alý tobynyń baqylaýyna alyndy.
Taǵy bir shaqyrtý 16 jastaǵy qyzǵa qatysty boldy. Ol anasymen renjisip, eskertpesten qurbysynyń úıine túneýge ketken.
Endi bir jaǵdaıda 6-synyp oqýshysy anasynan suranyp, dosynyń úıinde qonýǵa qalǵan. Ákesi balanyń anasynan ruqsat suraǵanyn bilmeı, polıtsııaǵa júgingen. Ata-anasy aýysymmen jumys isteıdi.
Al Petropavl turǵyny qoǵamdyq kólik aıaldamasynda jalǵyz júrgen jasóspirimdi baıqap, «102»-ge habarlaǵan. Polıtseıler balany qalalyq polıtsııa basqarmasyna jetkizdi. Ol túnde týysynyń úıinde qonýǵa ruqsat alǵanyn, biraq dostarymen qydyryp, oıyn-saýyq ortalyǵynda bolyp, sońǵy avtobýsqa úlgermeı qalǵanyn aıtty. Telefony úıde qalyp qoıǵan. Tańerteń polıtseıler ony anasyna tapsyryp, ákimshilik zańnamaǵa sáıkes eskertý berdi.
– 11 aıda Petropavlda polıtseıler kámeletke tolmaǵan 79 balanyń joǵalýyna baılanysty izdestirý is-sharalaryn júrgizdi. Ár osyndaı jaǵdaıda barlyq qyzmetter – ıývenaldy jáne patrýldik polıtseıler, krımınaldyq polıtsııanyń jedel ýákilderi, ýchaskelik ınspektorlar tartylady, olardy jedel basqarý ortalyǵynyń qyzmetkerleri úılestiredi.
Sol sebepti ata-analardan balalarynyń bos ýaqytyn jáne júrgen jerin baqylaýda ustaýdy, olardyń árdaıym baılanys quraldary bolýyn qadaǵalaýdy suraımyz. Eń bastysy – qaraýsyz qaldyrmańyzdar. Bul – jasóspirimder arasyndaǵy quqyqbuzýshylyqtyń negizgi sebebi, - dedi Petropavl qalalyq polıtsııa basqarmasynyń bastyǵy Marat Jumalıev.
Buǵan deıin Aqmolada úsh kún buryn joǵalǵan azamattyń denesi ózen jaǵasynan tabylǵanyn jazǵan edik.