Petropavlda bıyl 181 jeke turǵyn úı buzylyp, ornyna jańa ǵımarattar salynady
PETROPAVL. KAZINFORM – Petropavlda rennovatsııa baǵdarlamasy aıasynda sońǵy 6 jylda 2 myńnan astam jeke turǵyn úı buzylyp, qalanyń turǵyn úı qory jańartyldy. Nátıje bergen bul jumys bıyl da jalǵasady.
Petropavl ákimi Serik Muhamedıev turǵyndarmen kezdesýde qalada turǵyn úı baǵdarlamasynyń qalaı atqarylyp jatqanyn aıtty.
Byltyr oblys ortalyǵynda 191 myń sharshy metr úı qoldanysqa berilgen. Bul ótken jylǵy kórsetkishpen shamalas. Qazirgi ýaqytta 11 bıýdjettik, 14 kommertsııalyq kópqabatty úılerdiń qurylysy júrip jatyr.
«Jaqynda ótken halyqaralyq ınvestıtsııalyq qurylys forýmynda 60 mlrd teńgeden asatyn somaǵa áriptestik jóninde memorandýmǵa otyrdyq. Nátıjesinde Petropavlda zamanaýı turǵyn úı keshenderi salynady. Talaptarymyzdy jetkizdik, onda turǵyndarǵa yńǵaıly bolýy úshin bári eskeriledi. Sondaı-aq 18 qabattan bıik turǵyn úılerden bas tartyp, olardyń qurylysyna tyıym saldyq. Odan bólek, qalada núkteli qurylys toqtatylady. Shaǵyn aýdandarda qurylys jalǵasady. Rennovatsııa baǵdarlamasy aıasynda bıyl 3 apatty turǵyn úı men 18 tozyǵy jetken úı súrilip, ornyna zamanaýı nysandarmen sońǵy úlgidegi kópqabatty úıler salynady», - dedi Serik Muhamedıev.
Qazirgi ýaqytta Petropavlda 28 apatty jáne tozyǵy jetken 210 kópqabatty úı bar. Qala ákiminiń aıtýynsha, aldaǵy 5 jylda barlyq apatty jáne eskirgen úılerdiń bir bóligi buzylady, ornyna jańa baspana turǵyzylyp, 500-den astam adamnyń turǵyn úı jaǵdaıy jaqsarmaq.
Jeke turǵyn úı sektorynda jospar boıynsha bıyl 181 úı syrylmaq. Olardyń ıelerine ótemaqy nemese baspana beriledi.
«Jańa úılerdi salýmen qatar qoldanystaǵy baspanany da qalypty jaǵdaıda ustaý qajet. Bıyl Turǵyn úı salasyn jańǵyrtý baǵdarlamasy aıasynda kópqabatty tórt turǵyn úıdiń shatyry jóndeledi, taǵy úsheýine 18 lıft ornatylady. Taǵy 13 úı boıynsha jobalyq-smetalyq qujattar ázirlenip jatyr. Oblys ortalyǵyndaǵy baspanalardyń basym bóligi ótken ǵasyrdyń 70-80 jyldary salynǵan. Durys kútip-ustamasa apattyq jaǵdaılarǵa ákelýi múmkin. Turǵyndar óz úılerine, ıaǵnı, múlikterine jaýapty ekenin eske salamyn», - dedi Serik Muhamedıev.
