Petropavlda betperde kıgen qarýly adam dúken tonady
PETROPAVL. QazAqparat - Petropavl qalalyq ІІB birinshi polıtsııa bóliminiń tergeýshileri dúkenderdiń birine jasalǵan qarýly shabýylǵa qatysty qylmystyq isti tergeýde, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Polıtsııaǵa Beıbitshilik kóshesiniń boıyndaǵy saýda pavılondarynyń birine medıtsınalyq maska taǵynǵan er kisi shabýyl jasaǵan. Satýshyny pyshaqpen qorqytyp, aqsha men ishimdik talap etken. 25 myń teńge men áıeldiń uıaly telefonyn qoldy etken ury izin sýytqan. 51 jastaǵy jábirlenýshi birden «102» nómirine qońyraý shalǵan. Jedel qyzmetkerler kúdiktini Jumabaev kóshesiniń boıyndaǵy jalǵa beriletin páterlerdiń birinen tapty.
Kúdikti buryn birneshe ret sottalǵan 44 jasar Petropavl turǵyny bolyp shyqty. Óz kinásin tolyqtaı moıyndady. Qarý qoldaný arqyly qaraqshylyq jasaǵan kúdikti 5-jyldan 10 jylǵa deıin bas bostandyǵynan aıyrylýy múmkin.
«Atalmysh fakti boıynsha QR QK-niń 192-babyna sáıkes qylmystyq is qozǵaldy. Kúdikti Petropavl qalalyq ІІB ýaqytsha ustaý abaqtysyna qamaldy. Qazirgi tańda tergeý is-sharalary júrgizilýde. Tergeý aıaqtalǵannan keıin qylmystyq is sotqa jiberiledi», - dep málim etti Petropavl qalalyq ІІB bastyǵy, polıtsııa polkovnıgi Anatolıı Mýrzykanov.
