Petropavlda besinshi qabattan qulaǵan 4 jasar búldirshin jan saqtaý bóliminen shyǵaryldy

PETROPAVL. KAZINFORM – Petropavlda kóp qabatty úıdiń terezesinen qulap, aýyr jaraqat alǵan búldirshinniń beti beri qarady.

Soltústik Qazaqstan oblysy densaýlyq saqtaý basqarmasy baspasóz qyzmetiniń málimetinshe, 4 jasar bala úsh táýlikke jýyq jansaqtaý bóliminde jatty. Búgin travmatologııa bólimine aýystyryldy. 

«Jaǵdaıy jaqsarǵanymen, áli de aýyr. Qosarlas jaraqat alǵan, ıaǵnı basqa synyqtarmen qatar, jabyq bas-súıek jaraqaty bar. Mıy shaıqalyp, birneshe omyrtqa súıegi kompressııalyq synyq aldy. Oń jaq ókpesi soǵylyp, pnevmatoraks anyqtaldy», - deıdi vedomstvonyń baspasóz hatshysy Gúlnar Qalıeva. 

Esterińizge salaıyq, Petropavlda bes qabatty úıdiń terezesinen 4 jasar búldirshin qulap ketken edi. Oqıǵa 7 maýsym kúni «Bereke» shaǵyn aýdanyndaǵy Ibraev kóshesinde bolǵan.