Petropavlda bes saıajaıda órt bolyp, 10 ga jer janyp ketti
PETROPAVL. QazAqparat – Petropavlda Zarechnyı kentindegi saıajaı kooperatıvterinde órt shyǵyp, qatty jeldiń saldarynan jalyn 10 ga aýmaqty sharpydy, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamentiniń bastyǵy Ramıl Kamalovtyń aıtýynsha, tabıǵı jaǵdaılarǵa baılanysty qazir departament kúsheıtilgen rejımde jumys istep jatyr.
Demalystan bastap keshegi kúnmen eseptegende qýraǵan shóptiń, qamystyń, saıajaı ýchaskeleriniń órtenýine qatysty 130 shaqyrtý túsken.
Sonyń ishinde keshe, 12 sáýir kúni tańǵy saǵat 8.00-den bastap búgin kezekshilik aıaqtalǵanǵa deıin 20 shaqty shaqyrtý bolǵan.
Sonyń eń aýqymdysy – Zarechnyı kentindegi saıajaı kooperatıvterinde bolǵan órt.
«Barlyq garnızon toqtaýsyz jumys istedi. Órt sóndirý kólikteri qaıtpady. Keshe ekpini sekýndyna 20-23 metrge deıin jetetin jel soqty. Bul da jaǵdaıdyń ýshyǵýyna sebep boldy. Zarechnyı kentindegi saıajaı ýchaskelerine qatysty aıtar bolsam, saǵat 16.20 kezinde kezekshiniń pýltine «Renet» saıajaı ýchaskesinde qýraǵan shóp pen túrli qurylystardyń janyp jatqandyǵy týraly habarlama tústi. Oqıǵa ornyna birden órt sóndirýshiler jiberildi. Joǵary shaqyrý nómiri boıynsha jeke quram, sonyń ishinde bos aýysymdaǵy qyzmetkerler jumyldyryldy. Barlyq qyzmetter birlese áreket etti, máselen jol polıtsııasy oqıǵa ornyn jedel qorshaýǵa aldy. Qatty jeldiń saldarynan jalyn shóp, butalardy sharpyp, úı-jaılarǵa tez tarala bastady. Joldyń bolmaýy, jeńil kólikpen kelgen saıajaıshylardyń kóptigi jumysymyzdy bógedi. Saıajaıshylardy qaýipsiz jerge evakýatsııalaýǵa týra keldi. Arnaıy kólikterdi sol jerde sýmen toltyrý múmkin bolmaǵandyqtan Petropavldaǵy kommýnaldyq qyzmetterdiń 8 sý tasyǵysh kóligi tartyldy. Olar órt sóndirý kólikterine toqtaýsyz sýdy jetkizip turdy», - deıdi Ramıl Kamalov.
Oqıǵa ornynda shtab jáne qajet bolǵan jaǵdaıda turǵyndardy ornalastyrý úshin evakýatsııa pýnkti quryldy.
Alaıda, evakýatsııalyq pýnkti eshkimge qajet bolmaǵan. Departament bastyǵynyń aıtýynsha, qazirgi ýaqytta zardap shekkender, qaza tapqandar boıynsha málimet joq.
Órttiń shyǵý sebepteri deanyqtalyp jatyr. Ázirge negizgi eki boljam bar.
Birinshisi - belgisiz adamdardyń otty abaısyz qoldanýy, ekinshisi – ádeıi órt qoıý.
«Qazir bul jerde arnaıy komıssııa jumys istep jatyr. Naqty neshe saıajaı ýchaskesiniń janǵany ázirge belgisiz. Bul jerde 800-den astam ýchaske bar. «Renet», «Kırovets-3» saıajaı kooperatıvterindegi ýchaskelerge zaqym keldi. Qalǵandary aıtarlyqtaı zaqymdanǵan joq. Saıajaı qoǵamdastyqtary basshylarynyń aıtýynsha, ýchaskelerdiń shamamen 60 %-y ıesiz jatqan. Bıyl kóktemgi sý tasqyny shtattyq rejımde ótip jatyr. Sý az. Byltyr osy ýaqytta janǵan saıajaı ýchaskeleri sý astynda jatqan edi», - deıdi Ramıl Kamalov.
Sonymen qatar bul kúni Kopaı shaǵyn aýdanynda qamys órtenip, jalyn jaqyn mańdaǵy úılerge qaýip tóndirdi.
Qutqarýshylar 12 adamdy der kezinde qaýipsiz jerge shyǵaryp, jalynnyń turǵyn úılerdi sharpýyna jol bermedi.
