Petropavlda bes qabatty úıdiń shatyry opyrylyp tústi
PETROPAVL. QazAqparat – Petropavldaǵy bes qabatty úılerdiń biriniń shatyry ishinara opyrylyp tústi, zardap shekkender joq, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqys oqıǵa keshe, 11 aqpan kúni saǵat keshki 18.10 mınýt shamasynda bolǵan. Daǵdarys jaǵdaılar basqarmasyna Internatsıonal kóshesi, 2 mekenjaıyndaǵy 5 qabatty úıdiń shatyrynyń ishinara opyrylyp qulaǵandyǵy týraly habar túsken.
Birden apat bolǵan jerge oblystyq TJD, Petropavl qalalyq ákimdiginiń ókilderi jetti. Mamandardyń aıtýynsha, kóp qabatty úıdiń shıfermen jabylǵan shatyrynyń 24 sharshy metrine zaqym kelgen. Zardap shekkender men qaza tapqandar joq.
Bes qabatty úı 1968 jyly salynǵan, 120 páterli. Aldyn ala boljam boıynsha, shatyrdyń aǵash konstrýktsııasy shirigen nemese jaýǵan qardy kótere almaı opyrylyp ketken.
Eske sala ketsek , byltyr naýryzda Petropavldaǵy Bolatbaev kóshesindegi kóp qabatty úılerdiń biriniń shatyry qalyń qardy kótere almaı ortasyna túsken edi.
