Petropavlda bes qabatty úıdiń páterinen órt shyǵyp, 33 adam evakýatsııalandy

ASTANA. KAZINFORM - Petropavl qalasynyń Ýálıhanov kóshesinde ornalasqan bes qabatty turǵyn úıdiń ekinshi qabatyndaǵy páterden órt shyqty, dep habarlaıdy QR Tótenshe jaǵdaılar mınıstrliginiń baspasóz qyzmeti.

TJM qyzmetkerleri jedel jetip, turǵyndardy evakýatsııalady. Barlyǵy 33 adam, onyń ishinde 7 bala qaýipsiz jerge shyǵaryldy.

Qutqarýshylardyń úılesimdi áreketteriniń arqasynda órttiń odan ári órshýine jol berilmeı, turǵyndardyń qaýipsizdigi qamtamasyz etildi.

TJM órttiń alǵashqy belgileri baıqalǵan jaǵdaıda dereý qutqarý qyzmetine habarlasyp, sabyr saqtaý qajettigin eskertti.

Osyǵan deıin Aqtóbede kópqabatty úıdiń páterinen órt shyǵyp, 10 adam qaýipsiz jerge kóshirilgeni týraly jazdyq.