Petropavlda bes asyq jáne asyq atýdan el chempıonaty ótip jatyr
PETROPAVL. KAZINFORM – Petropavlda bes asyq jáne asyq atý ulttyq sport túrlerinen bastalǵan Qazaqstan Respýblıkasy chempıonatyna 19 komanda qatysyp jatyr.
Olardyń arasynda tek Shyǵys Qazaqstan oblysynyń ǵana sportshylary joq. Jalpy bul joly jarys alańyna 100-den astam sportshy shyqqan. Olardyń ishinde halyqaralyq jarystardyń jeńimpazdary da bar.
- Bul chempıonat – tek sporttyq báseke ǵana emes, bul – halqymyzdyń san ǵasyrlyq tarıhynan syr shertetin, urpaqtan-urpaqqa jalǵasyp kele jatqan rýhanı qundylyqtyń jalǵasy. Asyq oıyny – ult tárbıesiniń ózegine aınalǵan, ulttyq sanany qalyptastyratyn erekshe mádenı mura. Búgingi is-shara – salt-dástúrimizdi ulyqtaýmen qatar, ulttyq sport arqyly el mereıin ústem etip júrgen sańlaqtarymyzdy tanystyratyn kún. Solardyń biri – Sánııa Ásker. Ol 2024 jyly Astanada ótken V Dúnıejúzilik kóshpendiler oıyndarynda Qazaqstan áıelder quramasy sapynda óner kórsetip, altyn júldeni qanjyǵasyna baılady. Asyq atý sheberi – Kamıla Seksembaı. Byltyr álem kýbogynda top jardy. Mine, osyndaı tulǵalar – eldiń rýhyn kóteretin, jas býynǵa baǵyt-baǵdar beretin laıyqty úlgi, - dedi Soltústik Qazaqstan oblystyq Dene shynyqtyrý jáne sport basqarmasynyń basshysy Ádilhan Saǵyndyqov.
Bul jarysta SQO namysyn alty sportshy qorǵaıdy, olar: Kenjehan Ákimjanov, Damır Súndetov, Qanat Jahın, Sanııa Ásker, Sabına Ermaǵanbet jáne Kamıla Seksembaı.
Chempıonatta SQO-nyń asyq atýdan aǵa jattyqtyrýshysy Aqjan Suraǵanovqa «Asyq atý sportynyń qaıratkeri» medali tabys etildi.
Bes asyq jáne asyq atý ulttyq sport túrlerinen bastalǵan Qazaqstan chempıonaty 13 maýsymǵa deıin jalǵasady.
Buǵan deıin Qazaqstan quramasy sporttyq gımnastıkadan Azııa chempıonatynda 3 medal jeńip alǵanyn jazǵan edik.