Petropavlda belgisiz er adam kópqabatty úıdiń mańynda ıt soıǵan
PETROPAVL. QazAqparat – Petropavlda belgisiz er adam kópqabatty úıdiń mańynda ıt soıǵan. Qazir polıtsııa er adamnyń kim ekenin anyqtap jatyr, dep habarlaıdy QazAqparat tilshisi.
Búgin áleýmettik jelige Petropavldaǵy N.Nazarbaev kóshesi, 351 úıdegi turǵyndardyń biri jantúrshigerlik beınejazbany júktedi. Avtordyń aıtýynsha, er adam kópqabatty úıdiń terezeleriniń aldynda ıtti soıyp, múshelegen. Ol beınejazbaǵa tıisti organdardyń nazaryn aýdaryp, shara qoldanýyn surady.
Petropavl qalalyq polıtsııa basqarmasy beınejazbaǵa baılanysty jaýap berdi.
«Eger sizder qandaı da bir quqyq buzýshylyqtyń kýágeri bolsańyz, ol jaıynda «102» jedel arnasyna habarlaýyńyz qajet. Jarııalanǵan beınejazba jáne foto boıynsha aıtarymyz, bul derek Petropavl qalalyq polıtsııa basqarmasynda tirkeldi. Qazirgi ýaqytta er adamnyń jáne basqa da qatysýshylardyń jeke bastary anyqtalyp jatyr», - delingen jaýapta.
