Petropavlda «balgermin» dep adamdardy aldaǵan áıel ustaldy
ASTANA. QazAqparat - Petropavl qalasynyń ІІB qyzmetkerleri alaıaqtyq jasaǵan 53 jastaǵy Mamlıýt aýdanynyń turǵynyn qamaýǵa aldy, dep habarlaıdy «QazAqparat» HAA tilshisi.
Polıtsııa qyzmetkerlerine bir apta boıy alaıaqtyqqa qatysty aryzdar kelip túse bastaǵan. Jábirlenýshiler aryzynda belgisiz áıeldiń rásimderdi oryndap, aýrýlardy emdeýge jáne bolashaqty boljaýǵa bolatynyn aıtyp aldaǵanyn jazǵan. Degenmen, emnen keıin adamdardyń úıinen aqsha joǵalyp ketken.
«Tipti bir jaǵdaıda álgi áıel kóshedegi beıtanys áıelge jaqyndap densaýlyǵyn suraǵan. Jábirlenýshi aıaǵynyń aýyratynyn aıtyp muńyn shaǵady. Qalalyqtyń úıine kelgen kúdikti óziniń salt-joralaryn oryndap, jastyqtyń ishine zergerlik buıymdar men aqshany tigip qoıýdy suraǵan. Úı ıesi basqa sharýaǵa aınala bergende alaıaq áıel aqshany alyp ketken», - dep habarlaıdy vedomstvonyń baspasóz qyzmeti.
Petropavl qalasynyń ІІB bastyǵynyń orynbasary Asan Meıramovtyń aıtýynsha, kúdikti áıel qalaǵa saýda jasaýǵa kelgen. Qazirgi ýaqytta atalǵan oqıǵa baılanysty QR QK 190-baby (alaıaqtyq) boıynsha sotqa deıingi tergeý amaldary bastalǵan.
Kúdiktiniń kinási dáleldense, ol 4 jylǵa deıin bas bostandyǵynan aıyrylýy múmkin.
