Petropavlda balalarynyń túngi qydyrysy úshin 52 ata-ana jazaǵa tartyldy
PETROPAVL. QazAqparat – Petropavlda balalaryn betimen jibergen 52 ata-ana ákimshilik jaýapkershilikke tartyldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, búginde ıývenaldyq polıtseılerdiń jumysy qyzǵan. Іndetti jappaı juqtyrý qaýpine baılanysty jazǵy demalys lagerleri men úıirme-klýbtar jumysy toqtap tur. Sondyqtan jasóspirimderge qajet tıisti qadaǵalaý jetkiliksiz.
Petropavlda ıývenaldyq polıtsııa bólimsheleriniń qyzmetkerleri muǵalimdermen birlese úı-úıdi aralap, jasóspirimdermen kezdesedi, túsindirý jumysyn júrgizedi. Maqsat – qadaǵalaı otyryp, balalardyń túrli qylmysqa barýyna jol bermeý.
16 jastaǵy jasóspirim polıtseılerdiń esebinde tur. Anasy balasynyń tárbıesine tıisti kóńil bólmeı, mindetin oryndamaǵany úshin úsh ret ákimshilik jaýapkershilikke tartyldy. ıÝvenaldyq polıtseıler bul balany erekshe baqylaýǵa aldy. Endi kezekti ret tártip buzǵan jaǵdaıda otbasyna qatysty materıal Petropavl qalasy ákimdigi janyndaǵy kámeletke tolmaǵandardyń isteri jónindegi komıssııanyń qaraýyna shyǵarylady.
«Negizinen turmysy tómen otbasyndaǵy jáne túrli esepte turǵan jasóspirimdermen jumys isteımiz. Turaqty túrde bilim mekemeleri, prokýratýra organdary, volonterler jáne qoǵamdyq uıym ókilderimen birlesken reıd júrgizilip turady. Múddeli vedomstvolardyń jáne qoǵamdyq uıymdardyń qoldaý kórsetýi óte mańyzdy. Ata-analardy da túsinýge bolady, qazirgi qıyn jaǵdaıda balalarynyń bos ýaqytyn uıymdastyrýǵa múmkindigi joq», - deıdi SQO PD JPQ basqarmasy bastyǵynyń orynbasary Aleksandr Rozbah.
Jazǵy demalys bastalǵaly balalarynyń túngi qydyrysy úshin 52 adam jaýapkershilikke tartyldy. Polıtseılerdiń aıtýynsha, keıde ata-analar balalaryn eresek týystaryna ertip jiberedi. Saǵat 23.00-den keıin balalarǵa tek ata-analarymen ne zańdy ókilderimen úıden tys jerde bolýǵa ruqsat etiledi.
Sondaı-aq balalary spırttik ishimdik ishkeni úshin 7 ata-ana jaýap berdi. Budan basqa, bir aı ishinde jasóspirimderdiń joǵalýynyń 21 deregi tirkeldi.
Tártip saqshylarynyń aıtýynsha, balalar óz betinshe úıden ketý arqyly óziniń erkindigin jáne táýelsizdigin kórsetkisi keledi.
