Petropavlda balalarǵa arnalǵan aýtızm ortalyǵy ashyldy
PETROPAVL. QazAqparat – Petropavlda kópshiliktiń suraýymen aýtızm derti bar balalarǵa arnalǵan ortalyq ashyldy, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, bıyl óńir basshysynyń eseptik kezdesýinde ata-analar aýtızm ortalyǵyn ashýdy suraǵan bolatyn. Jergilikti bılik bul máseleniń sheshilýine basa mán berdi. Búgin Bolat Ótemuratovtyń «Asyl Mıras» qorynyń qoldaýymen Petropavlda aýtızm ortalyǵy ashyldy.
«Bul ortalyqty ata-analar men balalar asyǵa kútti. Qarashada barokamera alynady. Bul qondyrǵy balalarǵa óte qajet. Endi basqa óńirlerge barýdyń qajeti joq», - dedi oblys ákimi Qumar Aqsaqalov ortalyqtyń ashylý saltanatynda.
Ortalyqta balalarǵa barlyq jaǵdaı jasalǵan, ınnovatsııalyq ádister qoldanylady, bilikti mamandar jumys isteıdi. Munda balalarǵa dıagnostıka jasalady, keshendi ońaltýdan jáne áleýmettik beıimdelýden ótedi.
Petropavlda qazir aýtıst balalarmen jumys isteıtin 3 ınklıýzıvti kabınet bar, jyl sońyna deıin ár aýdanda ashylady. Bıyl 200 muǵalim arnaıy daıyndyqtan ótti. Bunyń barlyǵy balalardy ómirge beıimdep, elimizdiń tolyqqandy azamattaryn qalyptastyrýǵa septigin tıgizbek.
