Petropavlda balalardyń quqyǵyn buzatyn Telegram arna jumys istep tur
PETROPAVL. KAZINFORM — Petropavlda balalardyń fotosy kórsetilip, aty-jóni jáne olarǵa qatysty túrli jaman sóz aıtylǵan telegramm-kanal áshkere boldy.
Telegramm-kanaldy kimniń qurǵany jáne qashan qurylǵany belgisiz. Onyń 10 myńnan astam oqyrmany bolǵan. Avtor qala mektepteriniń oqýshylary jaıynda úzdiksiz aqparat salyp kelgen.
Bul týraly Soltústik Qazaqstan oblystyq bilim basqarmasy túsinik berdi.
— Kámeletke tolmaǵan balalar týraly uıatsyz aqparaty bar telegramm-kanaldyń barlyǵy týraly áleýmettik jelilerge júrgizilgen kúndelikti monıtorıng barysynda anyqtaldy. Oblystyń barlyq mektepteri men kolledjderinde profılaktıkalyq jumys kúsheıtildi. Petropavl qalasynyń bilim bólimi polıtsııa departamentine kómek surap resmı hat joldady. Qazir SQO polıtsııa departamentimen birlesip ony jabý jáne osy telegramm-kanaldy qurǵan adamdardy jaýapkershilikke tartý týraly másele sheshilip jatyr. Ata-analardan balalaryna muqııat bolýdy jáne olardyń kiretin saıttaryn baqylaýǵa ustaýdy suraımyz, — delingen baspasóz habarlamasynda.
Buǵan deıin Petropavlda jekemenshik balabaqshalar jabylýy múmkin ekenin jazǵan edik.