Petropavlda balalar úlken tennıs úıirmesine tegin baratyn boldy
PETROPAVL. QazAqparat – Petropavlda úlken tennıs úıirmesine balalar tegin qabyldanyp jatyr. Óńirde sporttyń bul túrin damytý úshin shetelden arnaıy jattyqtyrýshylar alyndy, dep habarlaıdy QazAqparat tilshisi.
Petropavlda úsh jyl buryn tennıs ortalyǵy ashyldy. Qazir munda 250 adam tennıspen aınalyssa, sonyń 170-i bala.
Úlken tennıs – qymbat sport túrleriniń biri. Úıirmelerdiń eń arzany 6 myń teńgeden bastalady. Biraq muny kópshiliktiń qaltasy kótere bermeıdi.
Endi tennıspen aınalysatyn jasóspirimderdiń qatary arta túspek. Maýsym aıynan bastap ortalyqta úlken tennıs úıirmesi balalar úshin tegin bolmaq.
«Ortalyqta 5 jastan 17-ge deıingi balalar jattyǵady. Aıyna eki ret qalalyq týrnırlerdi ótkizip turamyz. Jeńimpazdardy respýblıkalyq jarystarǵa jiberip turamyz. Bıyl Qaraǵandy, Nur-Sultan, Almaty qalalarynda týrnırlerde boldyq. Ol úshin dene shynyqtyrý jáne sport basqarmasynan qarajat bólingen. Qazir balalardy tegin qabyldaımyz. Ol úshin ata-ana bizge habarlasyp, ótinim qaldyrýy qajet», - deıdi tennıs ortalyǵynyń dırektory Alık Esimov.
Mádına Omarova óz jasyndaǵy úzdik sportshylardyń biri. Ol respýblıkalyq jarystarda júldeli oryndardan kórinip júr. 13 jasar jasóspirim sporttyń bul túrimen 7 jyldan beri aınalysady.
«Maǵan sporttyń bul túri óte unaıdy. Tennıs kortyna alǵash ret 6 jasymda kelgen edim. Búgingi kúnge deıin men Almaty, Nur-Sultan qalalarynda, Reseıde ótken jarystarǵa qatystym, jaqsy nátıje kórsettim. Osy aptanyń sońynda Almaty qalasyna 14 jasqa deıingi balalar arasynda ótetin respýblıkalyq týrnırge attanamyn», - deıdi jas sportshy.
Tennıs ortalyǵynyń 7 korty bar, onyń úsheýi ishinde, 4-eýi dalada ornalasqan. Balalarmen Ózbekstannan arnaıy shaqyrtylǵan jattyqtyrýshylar jattyǵady.
