Petropavlda balalar lageri sanatorly-kýrorttyq keshenge aınalmaq
PETROPAVL. KAZINFORM – Petropavlda balalar lagerin sanatorly-kýrorttyq keshenge aınaldyrýǵa 2,5 mlrd teńge jumsalady.
Bul jobany jergilikti kásipker qolǵa aldy. Úsh jyldyń ishinde qazirgi «Volna» balalar lageri 500 adamdyq keshenge aınalmaq.
Soltústik Qazaqstan oblysynyń ákimi Ǵaýez Nurmuhambetov nysandy baryp kórdi.
- Jergilikti kásipker burynǵy «Volna» balalar lagerin qaıta jańǵyrtyp, ony jyl boıy jumys isteıtin keshenge aınaldyryp jatyr. Petropavl mańynda ornalasqandyqtan turǵyndar men týrısterge yńǵaıly bolady. Jańa nysanda 150 nómir bolady, demalýshylarǵa saýyqtyrý protsedýralary usynylmaq. Keshenniń ashylýy demalystyń sapasyn jaqsartyp qana qoımaı, 150 turaqty jumys ornyn qurady. Bul joba óńirde medıtsınalyq týrızmniń damýyna oń áserin tıgizedi, - dedi óńir basshysy.
Oblys ákimi basqa da týrıstik nysandardyń qurylysyn kórip, jumys barysymen tanysty. Máselen Petropavlda jańa «Samovar» qonaq úıi ashylmaq. Bul jobaǵa 1 mlrd. teńge ınvestıtsııa salynǵan. «Damý» qorynan memlekettik qoldaý kórsetildi. Qonaq úıde 34 nómir bolady, 15 jańa jumys orny qurylady. Petropavlda qazir 26 qonaq úı bar, olar 800 demalýshyny qabyldaı alady.
Budan bólek, Imantaý-Shalqar kýrorttyq aımaǵynda ınvestorlar 16 jobany júzege asyryp, ekootelder men glempıngter salyp jatyr. Mundaı jobalar týrıstik ınfraqurylymdy jáne qyzmetterdiń sapasyn jaqsartýǵa, halyqty jumyspen qamtamasyz etýge, jańa ınvestorlardy tartýǵa jáne óńirimizdi qosymsha tabys kózderimen qamtýǵa yqpal etedi.
Buǵan deıin SQO-da qysta qaıda demalýǵa bolatyndyǵyn jazǵan edik.