Petropavlda balabaqsha daýyna baılanysty 6 laýazymdy tulǵa jaýapkershilikke tartyldy

PETROPAVL. QazAqparat – Petropavldyń mektepke deıingi bilim berýdiń 3 mekemesin kásipkerlerge senimgerlik basqarýǵa berýde zań buzýshylyqtarǵa jol bergen laýazymdy tulǵalar jazalandy, dep habarlaıdy QazAqparat tilshisi.

SQO prokýratýrasy baspasóz qyzmetiniń málimetinshe, qadaǵalaýshy organ Petropavldaǵy eki balabaqsha men bir bóbekjaı-baqshasyn senimgerlik basqarýǵa berýde zańnyń saqtalýyna taldaý júrgizdi. Nátıjesinde birneshe olqylyqtyń beti ashyldy.

«Mektepke deıingi tárbıe berý mekemeleri berilmes buryn vedomstvoaralyq komıssııa qurylmaǵan. Al kelisimsharttarda óndiristik janjaldardyń týý qateri eskerilmegen. Baıqaýdyń nátıjesi týraly málimet merzimdik BAQ-tarda jarııalanbaǵan. Sondaı-aq kásiptik talaptar boıynsha jalǵan málimet berilgen», - delingen oblystyq prokýratýranyń resmı habarlamasynda.

Tekseris qorytyndysy boıynsha kelisimshart buzyldy.

«Laýazymdy tulǵalar jaýapqa tartyldy. Bilim basqarmasynyń jáne ekonomıka basqarmasynyń orynbasarlary, bilim basqarmasynyń quqyqtyq jumys jónindegi bóliminiń basshysy jáne qalalyq bilim bóliminiń basshysy qatań tártiptik jaýapkershilikke tartyldy», - dedi osy máselege qatysty arnaıy uıymdastyrylǵan baspasóz máslıhatynda Qoǵamdyq múddeni qorǵaý jónindegi basqarmanyń prokýrory Nurjigit Saparov.

Eske sala ketsek, buǵan deıin Petropavldaǵy «Ivýshka» bóbekjaı-baqshasy men «Aq bota», «Baldáýren» balabaqshalaryn pılottyq joba aıasynda senimgerlik basqarýǵa berý kópshliktiń narazylyǵyn týdyrǵan bolatyn.