Petropavlda bala oıynynan órt shyqty
PETROPAVL. QazAqparat - Petropavlda bala oıynynan órt shyqty. Saldarynan 25 adamdy qaýipsiz jerge shyǵarýǵa týra keldi, dep habarlaıdy QazAqparat tilshisi.
SQO TJD baspasóz qyzmetiniń habarlaýynsha, órt búgin tańǵy toǵyzdar shamasynda Internatsıonal kóshesindegi 5 qabatty úıde bolǵan.
Oqıǵa ornyna jetken órt sóndirýshiler 4 qabatta páterdiń janyp jatqanyn kórgen. Birden iske kirisken qutqarýshylar jarty saǵattyń ishinde órtti tolyǵymen aýyzdyqtady.
Mamandardyń aıtýynsha, oqys oqıǵa ornynan 25 adam, sonyń ishinde 6 bala qaýipsiz jerge shyǵaryldy. Sondaı-aq 7 adamdy, onyń ishinde 3 balany qutqarýǵa týra keldi. 8 jastaǵy qyz ben 4 jastaǵy ul balany qutqarýshylar balkonnan avtobasqyshpen túsirip aldy. Órttiń shyǵýyna sirińkemen oınaǵan osy balalar sebepshi bolǵan eken.
Qazir kelgen shyǵyn mólsheri anyqtalyp jatyr. Órttiń saldarynan 10 sharshy metr aýmaqqa zaqym keldi.
