Petropavlda «Baqytty otbasy» ilki jobasy iske qosyldy
PETROPAVL. QazAqparat – Petropavlda qıyn jaǵdaıǵa tap bolǵan otbasylarǵa aqparattyq, zańgerlik kómek beretin «Baqytty otbasy» áleýmettik ortalyǵy ashyldy, dep habarlaıdy QazAqparat tilshisi.
«Baqytty otbasy» áleýmettik ortalyǵynyń kómegine 18 jasqa deıingi múgedek balany tárbıelep otyrǵan ata-analar, turmysy nashar jáne kóp balaly otbasylar, eńbek kúshi artyq óńirlerden qonys aýdarǵan úıelmender júgine alady.
«Maqsat - memleket júzege asyryp jatqan baǵdarlamalar týraly túsinik berý. Qajet bolǵan jaǵdaıda «Neke jáne otbasy týraly», «Turǵyn úı qatynastary týraly» Zańdarǵa, QR Eńbek kodeksine jáne ózge de máseleler boıynsha zańgerlik keńes bere alamyz. Otbasylar, máselen, ózderine memleketten qandaı kómek bar ekenin bile alady. Áleýmetik keńseniń qyzmetkerleri jumys izdeýge jáne jumysqa ornalasýǵa járdemdesedi. Kópbalaly nemese kishkentaı balasy bar ana kelse, balasyn arnaıy bólmede qaldyryp, ózi esh kedergisiz qajetti aqparatty ala alady», - deıdi «Baqytty otbasy» áleýmettik ortalyǵynyń dırektory Danııar Ábýtálip.
Ortalyq saǵat 9.00-den keshki saǵat 18.00-ge deıin jumys isteıdi.
Joba «bir tereze» qaǵıdaty boıynsha, sondaı-aq telefon baılanysy, WhatsApp jáne Telegram messendjerleri arqyly onlaın túrde de qyzmet kórsetedi.
Munda ár salanyń jaýapty mamandary, sondaı-aq psıholog belgilengen keste boıynsha qabyldaıdy.
Joba memlekettik tapsyrys aıasynda júzege asyrylyp jatqandyqtan, barlyq qyzmet tegin kórsetiledi.
SQO jumyspen qamtýdy úılestirý jáne áleýmettik baǵdarlamalar basqarmasynyń málimetinshe, oblysta 18 jasqa deıingi múgedek balalardy tárbıelep otyrǵan, turmysy nashar, kópbalaly 14 myńnan asa otbasy bar.
Ortalyq qanatqaqty joba bolǵandyqtan 3 myńǵa jýyq adamǵa kómek kórsetýdi josparlaǵan.
