Petropavlda azyq-túlik dúkeni órtendi
PETROPAVL. QazAqparat – Petropavlda «Nadgore» azyq-túlik dúkeni órtendi, zardap shekkender joq, dep habarlaıdy QazAqparat tilshisi.
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, 11 qyrkúıek, saǵat 3.32 mınýt ketkende órt sóndirý qyzmetine Petropavldaǵy Potanın kóshesi, 130 úıdiń janyp jatqandyǵy jóninde habar túsedi. Órt «Nadgore» azyq-túlik dúkeninen shyqqan eken.
Oqıǵa ornyna birden 5 arnaıy tehnıka men jeke quramnan 19 maman jumyldyryldy. Nátıjesinde órt tolyǵymen bir saǵat shamasynda sóndirildi.
«Órt 35 sharshy metr aýmaqty qamtydy. Dúken ǵımaratynyń shatyry jáne tóbesi zaqymdandy. Zardap shekkender joq. Aldyn ala boljam boıynsha jalyn elektr symdarynyń qysqa tuıyqtalýynan shyǵýy múmkin», - delingen baspasóz habarlamasynda.
