Petropavlda ázirlik qujatyn almaǵan úıler jylytý jelisine qosylmaýy múmkin

PETROPAVL. QazAqparat – Petropavlda áleýmettik nysandar qysqy maýsymǵa ázirlik qujattaryn alyp bolýǵa jaqyndasa, kóp qabatty úılerge jaýaptylar bul sharýany atqarýǵa asyǵar emes, dep habarlaıdy QazAqparat tilshisi.

Soltústik Qazaqstan oblystyq ákimdiginde qysqy jylytý maýsymyna ázirlikti pysyqtaǵan jıyn ótti.

Petropavl ákimi Bolat Jumabekovtyń aıtýynsha, ótken jylytý maýsymynda turǵyndardan 167 aryz-shaǵym túsken. Mamandar onyń árqaısysyn zerdelep, sebebin anyqtady.

«55 jaǵdaıda kóp qabatty úıler jylytý júıesin aldyn ala jýyp, tazalamaǵan, olardyń qysqy maýsymǵa ázirlik qujaty bolmady. 99 jaǵdaıda páter ıeleri jylytý júıesine ózdiginen ózgeris engizip, aýystyrǵan.

Saldarynan keı páterlerge jylý durys barmaı, qysta tońyp shyqty. Qazir bul úılerdiń turǵyndarymen jumys istelip, túsindirilip jatyr, olqylyqtardyń orny toltyrylady. Úshinshi sebebi – jylytý júıesiniń eskirýi», - deıdi Bolat Jumabekov.

Eskirgen jylytý qubyrlary máselesin sheshý úshin olar senimgerlik basqarýǵa berilip jatyr. Qala ákiminiń aıtýynsha, 131 nysannyń jáne buryn ıesiz jatqan 10 shaqyrym jeli «Petropavl jylý jelileri» kompanııasyna berilgen. Qazir taǵy sonshasynyń qujaty ázirlenip jatyr.

Jalpy Petropavlda 1106 kóp qabatty úı bar. Sonyń 593-i, ıaǵnı 54 %-y jylý jelilerin jýyp, tazalaǵan. 400-den astamy ázirlik qujatyn aldy. Al oblys ortalyǵynda 184 áleýmettik nysan bolsa, sonyń 159-y nemese 86 %-y qysqy jylytý maýsymyna deıin tıisti jumystardy atqardy.

«Petropavlda ǵımarattardyń jylytý júıesin qysqa ázirleıtin alty kompanııa bar. Olardyń barlyǵynda da qazir tapsyrys jetkilikti. 1 qyrkúıekke deıin bul jumysty barynsha jedeldetýge tyrysamyz.

Petropavl jylý jelilerimen jaǵdaıdy saraptadyq, bıyl jylytý júıesin qysqa ázirlemegen kóp qabatty úılerge jylý bermeýdi usynyp otyrmyz», - deıdi Bolat Jumabekov.