Petropavlda ájesi 3 jasar nemeresin avtobýsta qaldyryp ketken
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldaǵy Ýálıhanov kóshesindegi polıtsııanyń statsıonarlyq pýnktine saǵat 12.00 shamasynda 3 jasar sábıdi qoǵamdyq avtobýstyń júrgizýshisi alyp kelgen. Er adamnyń aıtýynsha, ol balany baǵytynyń sońynda salonnan tapqan. Tabylǵan qyz týraly aqparatty polıtsııanyń ýchaskelik ınspektory Janbota Qaıyrkenov Petropavl qalasy polıtsııa basqarmasy jedel basqarý ortalyǵyna berdi.
«Qyz meniń qolyma kelip, jylaýyn toqtatty. Biz oǵan táttiler satyp ákeldik. Sábı anasynyń esiminen basqa, eshteńe aıta almady», - deıdi ýchaskelik ınspektor.
Al balanyń joǵalǵany týraly «102» arnasyna eshkim ótinish bildirgen joq. Jedel basqarý ortalyǵynyń qyzmetkerleri barlyq polıtsııa bólimshelerin, qalalyq polıtsııa basqarmasynyń jeke quramyn baǵdarlap, qyzdyń ata-anasyn izdeýge kiristi.
Bul ýaqytta Petropavl turǵyny sábıiniń joǵalǵanyn baıqap, izdeýge kirisken edi. Qatty ýaıymdaǵan áıel Bereke aýdanyndaǵy jaqyn mańdaǵy polıtsııa bólimshesine bardy. Statsıonarlyq pýnktte oǵan balanyń qalanyń ekinshi shetindegi modýlde ekenin aıtty. Fotosýretterden áıel qyzyn tanydy.
«Bul qorqynyshty tús sııaqty boldy. Ne isterimdi bilmeı qaldym. Basyma birden jaman oılar keldi. Polıtsııa qyzmetkeri maǵan qyzymnyń áriptesterimen birge ekenin jáne bári jaqsy ekenin aıtqan kezde qýanǵanymnan jylap jiberdim. Olarǵa alǵysym sheksiz», - deıdi qyzdyń anasy.
Keıin belgili bolǵandaı, sábı ájesimen birge avtobýsqa mingen. Jolda uıyqtap qalǵan. Al zeınetker jolda ózin nashar sezinip, kólikten túsip qalǵan. Ol, tipti, avtobýstan qalaı shyǵyp, úıge qalaı jetkenin de bilmeıdi.
