Petropavlda áıelder arasyndaǵy qazaq kúresinen úzdikter anyqtaldy

PETROPAVL. QazAqparat - Petropavl qalasynyń Sport saraıynda erler men áıelder arasynda qazaq kúresinen Qazaqstan chempıonaty ótip jatyr, dep habarlaıdy QazAqparat.

Soltústik Qazaqstan oblysy Deneshynyqtyrý jáne sport basqarmasy baspasóz qyzmetiniń málimetinshe, jarysqa Astana, Almaty, Shymkent qalalary men elimizdiń 14 oblysynyń sportshylar qatysady. Tórt kún boıy túrli salmaq dárejesindegi 300-ge jýyq atlet úzdik ataný úshin kúresedi. Sonyń ishinde áıelder - jeti, al er adamdar - toǵyz salmaq dárejesinde shyǵady.

«48 keli salmaq dárejesinde aqtyq saıysta soltústikqazaqstandyq Aıdana Ótegelova astanalyq Dınara Ysqaqovadan jeńilip qaldy. «Qola» júldeni qostanaılyq Názıra Qasymjanova men Qyzylorda sportshysy Málıka Alpysbaı ózara bólisken», - dep baıandady baspasóz qyzmetinen.

52 keli salmaqta «altyndy» elordalyq Botagóz Dúısembaeva qanjyǵasyna baılasa, kúmis júldeni Shymkent atleti Aqmarjan Baltabaı jeńip aldy. Úshinshi oryndy qyzylordalyq Aıda Ermash pen Atyraý sportshysy Aıymgúl Mahýova teń bólisti.

57 keli salmaq dárejesinde birinshi oryndy Shymkent atleti Araılym Rákish, ekinshi oryndy - qostanaılyq Jannur Kenjebekova jeńip alǵan. Bul salmaqtaǵy úzdikter «úshtigin» Aıjan Qarash (Pavlodar) pen Symbat Dýlatova (Taraz) japty.

63 keli salmaqta fınalda almatylyq Márııam Ordabaeva Astanadan kelgen qarsylasy Uljan Dúısembaevany jeńdi. Qola medaldar Sabına Ybyraı (Qyzylorda) men Symbat Tórende (Qyzylorda).

78 keli salmaq dárejesinde shymkenttik atlet Ǵalııabaný Amanhanova aqtyq saıysta Taraz sportshysy Aqtolqyn Smaǵanbetovany jeńdi. Qola medaldi Leıla Arystanbek (Qyzylorda), Raısa Nurǵazıeva (Mańǵystaý) ózara bólisti.