Volonterler gýmanıtarlyq kómekti urlap jatyr: Petropavl turǵyny jalǵan habar taratty
PETROPAVL. KAZINFORM — Petropavlda gýmanıtarlyq azyq-túlik urlanyp jatyr dep jalǵan aqparat taratqan 47 jastaǵy áıel endi aıyppul tólemek.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl turǵyny ákimshilik ǵımarattardyń biriniń artynda azyq-túlik pen basqa da zattardy kólikke tıep jatqan volonterlerdi telefonǵa vıdeoǵa túsirip alǵan. Ol volonterler gýmanıtarlyq kómekti urlap jatyr dep oılaǵan. Biraq bul kúdigi týraly polıtsııaǵa habarlamaı, WhatsApp jelisindegi topqa beınejazbany júktegen. Іstiń baıybyna barmaı salynǵan rolık áp-sátte TikTok jelisinde tarap ketken.
Osylaısha, oblys ortalyǵynyń turǵyny jalǵan aqparattyń taraýyna jol berdi. Muny SQO PD ekstremızmge qarsy is-qımyl basqarmasynyń qyzmetkerleri áleýmettik jelilerge monıtorıng júrgizý barysynda anyqtady. Polıtsııa qyzmetkerleri «azyq-túlik urlanyp jatyr» degen habarlamany tekserdi. Shyn máninde tıelip jatqan júk Esil ózeniniń tasýynan zardap shekken Qyzyljar aýdanynyń Bolshaıa Malyshka aýylyna jiberilgen.
Oılanbastan asyǵystyq jasaǵan Petropavl turǵyny aıyppul túrinde ákimshilik jaýapkershilikke tartyldy.
Aıta ketsek, óńirde sý tasqyny bastalǵaly beri jalǵan aqparattyń taralýyna jol bermeý maqsatynda tártip saqshylary ınternet-keńistikti baqylaýdy kúsheıtken.
