Petropavlda aıaldamany qıratqan jigit 5 táýlikke qamaldy

PETROPAVL. QazAqparat – Petropavlda áınek aıaldamany shaqqan 21 jastaǵy jigit anyqtalyp, 5 táýlikke qamaýǵa alyndy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, 10 qazan kúni keshke bireý Petropavldaǵy Jýkov kóshesindegi áınek aıaldamany qıratqan. Sol jerden ótip bara jatqan júrginshilerdiń biri shýdy estigen, qıraǵan aıaldamany kóre sala, birden «102» nómirine habarlasqan. Nátıjesinde buzaqy kóp uzamaı qolǵa tústi.

Qala turǵynynyń polıtsııaǵa ýaqtyly júginýi quqyq buzýshyny izdep tabýǵa septigin tıgizdi. Ýchaskelik polıtsııa ınspektory 21 jastaǵy petropavldyqty anyqtap, jaýapqa tartty. Ol bul áreketke barýyn sol kezde alkogoldik mas kúıde bolǵanymen túsindirdi.

Buzaqyǵa qatysty QR Ákimshilik quqyq buzýshylyq týraly kodeksiniń 434-baby «Usaq buzaqylyq» boıynsha materıal jınaldy. 12 qazan kúni sot sheshimimen jigit 5 táýlikke ákimshilik qamaýǵa alyndy.

Keltirilgen shyǵyndy óteý týraly talap aryz berý úshin sot qaýlysy Petropavl qalalyq ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimine tapsyryldy.

«Budan bólek, sot buzaqynyń júris-turysyna 3 aı merzimge erekshe talap shyǵardy. Bul kezeńde oǵan alkogol ishýge tyıym salynady. Talaptyń oryndalýyn baqylaý ýchaskelik ınspektorǵa júkteledi. QR Ákimshilik quqyq buzýshylyq týraly kodeksiniń 669-baby 2-b. boıynsha erekshe talaptardy buzǵany úshin 5 aılyq eseptik kórsetkish mólsherinde aıyppul salý nemese 7 táýlikke qamaýǵa alý jazasy kózdelgen», - deıdi Petropavl qalalyq PB birinshi polıtsııa bóliminiń bastyǵy Tilegen Áljanov.

Jalpy jyl basynan Petropavl polıtseıleri usaq buzaqylyq jasaǵany úshin 303 adamdy jaýapqa tartty.